Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 138 Hüküm no: 135 Orijinal metin no: [25b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa ile Bayram Bey’in Ali Beşe’ye sattıkları sığır bedelinden alacakları olduğu Medîne-i Üsküdar mahallâtından Yeni Mahalle sâkinlerinden Mehmed Ağa b. Mehmed ve Bayram Bey b. Yusuf nâm kimesneler meclis-i şer‘-i şerîf-i lâzımü’t-tevkīrde Ali Beşe b. Mehmed nâm râcil mahzarında her biri üzerine da‘vâ ve takrîr-i kelâm edip mezbûr Ali Beşe zimmetinde sığır bahâsından ba‘de küllî hesâb beş bin yüz altmış altı akçe hakkım olup hâlen taleb eylediğimizde edâdan imtinâ‘ eder suâl olunup alıverilmesi murâdımızdır dediklerinde gıbbe’s-suâl mezbûr Ali Beşe cevâbında fi’l-hakīka müdde‘iyân-ı mezbûrân Mehmed Ağa ve Bayram Bey’e minvâl-i muharrer üzre sığır bahâsından ba‘de küllî hesâb meblağ-ı mezbûr beş bin yüz altmış altı akçe zimmetimde lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin ikrârı mûcebince müdde‘iyân-ı merkūmâna meblağ-ı mezkûru edâsıyla mezbûr Ali Beşe ilzâm olunup mâ hüve’l-vâki‘ gıbbe’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem li sene hamsin ve sittîn ve elf. Şuhûdü’l-hâl: Mehmed Çelebi b. Abdullah el-Mütevellî, Ali Çelebi b. Süleyman, Hüseyin Çelebi b. Ali, Mustafa Bey b. Mehmed ed-dellâl, Bayram Dede b. Mehmed, Dilâver Beşe b. Abdullah, Abdullah Beşe b. İskender ve gayr