Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 139 Hüküm no: 136 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa ile Bayram Bey’in Mustafa Halîfe’ye sattıkları öküz bedelinden alacakları olduğu Medîne-i Üsküdar mahallâtından Yeni Mahalle sâkinlerinden Mehmed Ağa b. Mehmed ve Bayram Bey b. Yusuf nâm kimesneler meclis-i şer‘-i şerîfde Mustafa Halîfe b. İlyas nâm kimesne mahzarında her biri üzerine da‘vâ ve takrîr-i kelâm edip min ba‘d Mustafa Halîfe zimmetinde öküz bahâsından beş bin yüz altmış altı akçe hakkımız olup ve gāib ani’l-meclis Derviş Çelebi zimmetinde dahi öküz bahâsından beş bin yüz altmış altı akçe hakkımız olmağla meblağ-ı mezkûra mezbûr Mustafa Halîfe tarafeynden emr ve kabûlü hâviye kefâlet-i sahîha-i şer‘iyye ile kefîl bi’l-mâl olmuşdur hâlen kendi zimmetinde olan hakkımız ile gāib-i mezbûr zimmetinde olan meblağ-ı mezbûru kefâleti hasebiyle mezbûr Mustafa Halîfe’den taleb eylediğimizde vermede te‘allül eder suâl olunsun dedikde gıbbe’s-suâl merkūm Mustafa Halîfe cevâbında fi’l-hakīka müdde‘iyân-ı mezbûrân Mehmed Ağa ve Bayram Bey’e minvâl-i meşrûh üzre öküz bahâsından meblağ-ı mezbûr beş bin yüz altmış altı akçe zimmetimde vâcibü’l-edâ deynim olup ve gāib-i mezbûr zimmetinde olan meblağ-ı mezkûra vech-i mübeyyen üzre kefîl bi’l-mâl olmuşidim deyû tav‘an ikrâr ve i‘tirâf etmeğin ikrârı mûcebince meblağayn-i mezkûreyni müdde‘iyân-ı mezbûrâna edâsıyla mezbûr Mustafa Halîfe’ye ilzâm olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şevvâli’l-mükerrem li sene hamsin ve sittîn ve elf. Şuhûdü’l-hâl: Mehmed Çelebi b. Abdullah el-Mütevellî, Ali Çelebi b. Süleyman el-Mübâşir, Hüseyin Çelebi b. Ali, Abdullah Beşe b. İskender, Dilâver el-Muhzır ve gayr