Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 139 Hüküm no: 137 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Hüseyin’in kendisini boşayan kocası Şeyh Şaban Efendi’den alacaklarını tahsil ettiği Husûs-ı âti’z-zikrin mahallinde tahrîri iltimâs olunmağın kıbel-i şer‘-i kavîmden fahrü’l-kuzât Mevlânâ Mehmed Efendi b. Nasuh irsâl olunup ol dahi zeyl-i kitâbda mastûretü’l-esâmî olan müslimîn ile medîne-i Hazret-i Ebâ Eyyûb el-Ensârî’de Câmi‘-i kebîr mahallesi sükkânından umdetü’s-sâlikîn eş-Şeyh Şaban Efendi b. Yahya nâm kimesnenin menziline varıp akd-i meclis-i şer‘ eyledikde mezbûr Şaban Efendi’nin zevce-i mutallakası fahrü’l-muhadderât Âişe Hâtun bt. Hüseyin meclis-i mezkûrda işbu hâmil-i hâze’l-kitâbi’l-müstetâb mûmâ-ileyh eş-Şeyh Şaban Efendi mahzarında bi tav‘ihâ ikrâr ve i‘tirâf edip mezbûr Şaban Efendi’nin zevce-i menkûhası olup beni talâk-ı bâ’in ile tatlîk etmekle zimmetinde mütekarrir olan dört bin cedîd akçe mehr-i müeccelim ile nafaka-i iddet-i şer‘iyyem ve me’ûnet-i süknâm mukābelesinde dört yüz elli akçe ki cem‘an dört bin dört yüz elli akçe hakkımı mûmâ-ileyh eş-Şeyh Şaban Efendi yedinden ahz ü kabz edip zevciyete müte‘allik âmme-i da‘vâdan mûmâ-ileyh eş-Şeyh Şaban Efendi’nin zimmetini ibrâ ve iskāt eyledim dedikde mukırra-i mezbûre Âişe Hâtun’un minvâl-i muharrer üzre cârî ve sâdır olan ikrârını mûmâ-ileyh eş-Şeyh Şaban Efendi bi’l-muvâcehe tasdîk ve bi’l-müşâfehe tahkīk eyledikde husûs-ı mezbûru Mevlânâ-yı müşârun-ileyh mahallinde ketb ve terkīm ba‘dehû meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’l-ibtigā ketb olundu. Fi’l-yevmi’l-hâmis ve’l-ışrîn min Şevvâli’l-mükerrem li sene hamsin ve sittîn ve elf. Şuhûdü’l-hâl: Abdurrahman Beşe b. Yahya, Mustafa Beşe b. Mahmud, Mehmed Çelebi b. Hayreddin, Hüseyin Dede b. Şaban, Abdi Beşe b. Yahya, Dilâver el-Muhzır ve gayruhüm