Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 141 Hüküm no: 139 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Şeyhülislâm Ebû Said Efendi’nin mülk menzilinin Vezir Yusuf Paşa’ya satıldığı
Zikri câ’î husûsun mahallinde ketb ü tahrîri iltimâs olunmağın kıbel-i şer‘-i şerîfden umdetü kuzâti’l-İslâm Mevlânâ Mehmed Efendi b. Nasuh irsâl olunup ol dahi zeyl-i kitâbda mastûretü’l-esâmî müslimîn ile medîne-i Hazret-i Ebâ Eyyûb el-Ensârî’de Câmi‘-i kebîr mahallesinde sâkine umdetü’l-muhadderât zübdetü’l-muvakkarât Afîfe Hâtun hazretlerinin sa‘âdethânelerine varıp akd-i meclis-i şer‘-i şerîf eyledikde bundan esbak şeyhülislâm olan sultânü’l-ulemâ burhânü’l-fuzalâ’ câmi‘u eştâti’l-ulûm ve’l-ma‘ârif nâsıbu râyâti’l-fezâ’il ve’l-avârif keşşâfü’l-müşkilâti’d-dîniyye hallâlü’l-mu‘dilâti’l-yakīniyye müstekmilü kavânîni’l-ulûmi’l-Arabiyye müstahsilü berâhînü’l-fünûni’l-edebiyye câmi‘u’l-fürû‘ ve’l-usûl hâviyü’l-ma‘kūl ve’l-menkūl Ebû Said Efendi hazretlerinin kıbel-i şerîflerinden menzil-i âti’z-zikri bey‘a ve kabz-ı semene vekîl olup Abdullah Çelebi b. Rüstem ve Hasan Çelebi b. Mehmed el-Yesârî şehâdetleriyle şer‘an vekâlet-i sâbite olan umdetü’l-cüyûş Hüseyin Ağa b. Abdülbâkī meclis-i makūd-ı mezkûrda vezîr-i rûşen-zamîr müşîr-i müşterî-tedbîr sâhibü’l-cûd ve’l-ihsân müşîr-i müşârun-ileyh bi’l-benân râfi‘-i a‘lâmü’l-adli ve’l-insâf dâfi‘-i zalâmü’z-zulmi ve’l-i‘tisâb el-muhtas bi mezîdi’l-meliki’l-a‘lâ Hazret-i Yusuf Paşa -yesserallâhu bi’l-hayri mâ yeşâ- taraf-ı karînü’ş-şerîflerinden zikri câ’î menzili şirâya ve def‘-i semene vekîlleri olup bimâ hüve tarîkü’s-sübût şer‘an vekâlet-i sâbite olup Paşa-yı müşârun-ileyhin kethüdâları hizmetleriyle şerefyâb olan iftihârü’l-emâcid ve’l-ekârim Süleyman Ağa b. Ali el-vekîl muvâcehesinde bi’l-vekâle ikrâr eder ki müvekkil-i mûmâ-ileyh Ebû Said Efendi hazretlerinin emlâklarinden olup medîne-i mezbûrede Şah Sultan mahallesinde Taşlı Burunu demekle meşhûr mevzi‘de vâki‘ bir tarafdan Ferruh Kethüdâ bahçesi ve bir tarafdan sâhil-i bahr ve bir tarafdan merhûm Mehmed Paşa çayırı ve bir tarafdan tarîk-i âm ile mahdûd büyût-i adîdeyi ve hadîkayı müştemil olan mülk menzili cümle tevâbi‘iyle kethüdâ-i müşârun-ileyh Süleyman Ağa’ya bin beş yüz kıt‘a riyâlî guruş-ı kebîre bey‘-i kat‘î ile bâtten bey‘ ve teslîm ol dahi müvekkili paşa-yı mûmâ-ileyh Yusuf Paşa hazretleri nefsi için vech-i mübeyyen üzre iştirâ ve tesellüm ve kabz ve kabûl eyledikden sonra semen-i merkūmü’n-na‘t bin beş yüz kıt‘a guruşu vekâletim hasebiyle vekîl-i mezbûr Süleyman Ağa yedinden bi’t-tamâm ahz ü kabz eyledim, ba‘de’l-yevm mûmâ-ileyh Ebû Said Efendi hazretlerinin alâka ve medhalleri kalmamışdı[r] Paşa-yı müşârun-ileyh keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘î husûs-ı merkūmu Mevlânâ-yı mûmâ-ileyh mahallinde ketb ü tahrîr ba‘dehû meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene hamsin ve sittîn ve elf.
Şuhûdü’l-hâl: İsâ Ağa b. Abdülmennân, Ebûbekir Efendi b. Abdülbâkī, Mustafa Ağa b. Perviz hazînedâr, Sinan Bey kethüdâ-i teberdârân, Mehmed Ağa b. Ali, İbrahim Ağa b. ( ), Mehmed Ağa b. Kösec ( ), Mustafa b. Abdullah ve gayr
|