Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 142 Hüküm no: 140 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kenan b. Abdullah’ın İmam Osman Efendi Vakfı’ndan ödünç aldığı Mahmiye-i İstanbul’da merhûm İmâm Osman Efendi vakf eylediği nukūda bi’l-fi‘il mütevellî olan işbu râfi‘ü’l-kitâb umdetü’s-sâdât es-Seyyid Abdülkerim Efendi b. es-Seyyid Şaban meclis-i şer‘-i şerîf-i lâzımü’t-teşrîfde Kenan b. Abdullah nâm bevvâb-ı sultânî mahzarında üzerine da‘vâ ve takrîr-i kelâm edip mezbûr Kenan zimmetinde mâl-ı vakf-ı mezbûrdan elli kıt‘a riyâlî guruş asl-ı mâl ve yirmi bir ayda müctemi‘ olup ilzâm-ı rıbh-ı şer‘î olunan murâbahadan bin elli akçe ki cem‘an riyâlî guruş seksen beşer akçeye olmak üzre beş bin üç yüz akçe olup hâlen taleb eylediğimde edâdan imtinâ‘ eder suâl olunup teslîmine tenbîh olunmak matlûbumdur dedikde gıbbe’s-suâl mezbûr Kenan Bey cevâbında fi’l-vâki‘ vech-i muharrer üzre mâl-ı vakf-ı mezbûrdan elli kıt‘a riyâlî guruş-ı kebîr asl-ı mâl ve ilzâm-ı rıbh-ı şer‘î olunan murâbahadan minvâl-i muharrer üzre bin elli akçe ki beher guruş seksen beşer akçeye olmak üzre cem‘an vakf-ı mezbûra beş bin üç yüz akçe zimmetimde lâzımü[’l-edâ ve] lâzımü’l-kazâ deynim vardır deyû bi tav‘ihî ikrâr ve i‘tirâf etmeğin mûcebince meblağ-ı mezbûru mütevellî-i merkūm es-Seyyid Abdülkerim Efendi’ye edâ ve teslîm mersûm Kenan Bey’e tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene hamsin ve sittîn ve elf. Şuhûdü’l-hâl: Hüseyin Çelebi b. Ali, Bayram Sofu b. Mehmed, Dilâver b. Abdullah, Mehmed Efendi el-Kadı, Mustafa Beşe b. Mehmed