Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 142 Hüküm no: 141 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Şaban’ın Hacı Hüseyin’e mülk evini, bağını ve bir miktar buğdayını sattığı, tasarrufundaki vakıf tarlaların tasarruf hakkını devrettiği Mahrûse-i Kostantıniyye mahallâtından Hürrem Çavuş mahallesi sükkânından Ali Çelebi b. Şaban nâm kimesne meclis-i şer‘-i şerîf-i lâzımü’t-tevkīrde işbu râfi‘ü’l-kitâb el-Hâc Hüseyin b. Abdünnebi mahzarında bi’t-tav‘i’s-sâf ikrâr ve i‘tirâf edip silk-i mülkümde münselik olup Havâss-ı Kostantıniyye kazâsına tâbi‘ Çekmece-i kebîr muzâfâtından Kaparak nâm karyede vâki‘ bir tarafdan Muslu Çelebi mülkü ve bir tarafdan çeşme ve bir tarafdan cidâr-ı mescid ve bir tarafdan tarîk-i âm ile mahdûd fevkānî ve tahtânî iki bâb odaları ve bir anbarı ve bir fırını ve iki kıt‘a ahırı ve bir kıt‘a samanlığı ve bir kıt‘a harman yerini ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile ve menzil-i mezbûr içinde mevcûd bir çift kara sığır öküzünü ve sâir âlât-ı zirâ‘at ve esvâb-ı hirâsetimi ve yine karye-i mezbûrede vâki‘ bir tarafdan Ahmed Çelebi mülkü [27a] iki tarafdan mezbûr el-Hâc Hüseyin mülkü ve bir tarafdan tarîk-i âm [ile] mahdûd tahmînen bir dönüm bir kıt‘a mülk bağımı ve mârrü’z-zikr harman yerinde mevcûd vezn [ve] keyli beynimiz[de] ma‘lûm buğdayımı dahi mezbûr el-Hâc Hüseyin’e otuz bin fıddî nakd-i râyic fi’l-vakt akçeye bi safkatin vâhidetin bey‘-i bâtt-ı kat‘î [ile] bey‘ ve teslîm ol dahi vech-i meşrûh üzre iştirâ ve tesellüm ve kabz ve kabûl eyledikden sonra yine karye-i merkūme sınır[ı] kurbunda mev[â]zi‘-i müteferrikada vâki‘ merhûm ve mağfûrun-leh Sultan Bayezid Hân Evkāfı’ndan olup hudûdu beynimizde ma‘lûm bir kıt‘a çayır ile dokuz kıt‘a tarlalarımın hakk-ı tasarrufların ma‘rifet-i mütevellî-i evkāf-ı mezbûre ile merkūm el-Hâc Hüseyin’e altı bin cedîd akçe bedel mukābelesinde tefvîz ve ferağ eylediğimde ol dahi vech-i muharrer üzre tefevvuz ve kabûl eyleyip semen-i mezbûr ile bedel-i mezkûr ki cem‘an otuz altı bin akçeyi mezbûr el-Hâc Hüseyin yedinden tamâmen ahz ü kabz eyledim ba‘de’l-yevm emlâk-i merkūme mezbûr el-Hâc Hüseyin’in mülk-i müşterâsı olmuşdur keyfemâ yeşâ ve yehtâr mutasarrıf olsun ve arâzi dahi dâhil-i taht-ı tasarrufu olmuşdur emsâli tasarrufu gibi mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene hamsin ve sittîn ve elf. Şuhûdü’l-hâl: Mehmed Beşe b. Veli, Ali b. Hüseyin, Ahmed b. Mustafa, Ahmed Çelebi b. Abdullah, Mehmed Beşe b. Ali, Yusuf b. Murad