Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 144 Hüküm no: 143 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yorgi v. Franko’nun bakkal dükkânında beytülmâl emîninin el koyduğu eşyaları vârisine iadesi Vilâyet-i Rumeli’nde Kerpiniş kazâsına tâbi‘ Kalazmeni nâm karye sâkinlerinden Nikola v. Andriye nâm zimmînin li ebeveyn er karındaşı ve tarafından husûs-ı âti’z-zikre vekîl olup hasm-ı şer‘î-i câhid mahzarında Mehmed Beşe b. Abdullah ve Abdülkerim Beşe b. Hamza nâm kimesneler mahzar-ı şehâdetleriyle şer‘an vekâleti sâbite olan işbu bâ‘isü’l-kitâb Hasan Beşe b. Abdülmennân nâm râcil meclis-i şer‘-i şerîfde medîne-i Hazret-i Ebâ Eyyûb el-Ensârî’de beytülmâl-i âmme ve hâssa emîni olup zikr-i câ’î bakkal dükkânında mevcûd me’kûlât kısmından olan eşyâ bundan akdem hâlik olan Yorgi v. Franko nâm zimmînin mülkü olup zâhirde vâris-i ma‘rûfu olmamak zu‘muyla vâzı‘ü’l-yed olan fahrü’l-eşbâh Ahmed Çelebi b. Mehmed nâm kimesne mahzarında bi’l-vekâle üzerine da‘vâ ve takrîr-i kelâm edip medîne-i mezbûrede Çömlekçiler sûkunda vâki‘ ma‘lûm‘ü’l-hudûd bakkal dükkânı karındaşım müvekkil-i mezbûrun taht-ı tasarrufunda olmağla içinde mevcûd olup tahmînen elli bin akçe kıymetli me’kûlât kısmından olan eşyâ karındaşım gāib-i mezbûrun mülkü olup mukaddemâ vilâyetine azîmet eylediğinde hâlik-i mezbûru ücret [ile] destgâhdâr edip gitmişidi, hâlen eşyâ-i mezbûre hâlik-i merkūmun olmak üzre emîn-i mezbûr vaz‘-ı yed eder hattâ hâlik-i merkūm hâl-i hayâtında şuhûd-ı müslimîn huzûrunda ikrâr ve işhâd dahi etmişdir suâl olunup emîn-i mezbûrun kasr-ı yedine tenbîh olunmak matlûbumdur dedikde gıbbe’s-suâl emîn-i mezbûr cevâbında hâlik-i mezbûrun metrûkâtından olmak üzre eşyâ-i merkūmeye vech-i muharrer üzre vaz‘[-ı yed] eylediği[ni] [27b] ikrâr lâkin eşyâ-i mezbûre müvekkil-i merkūmenin mülkü olup hâlik-i merkūmun tarafından ücret ile destgâhdâr olduğunu münkir olıcak vekîl-i mezbûr Hasan Beşe’den da‘vâsını mübeyyine beyyine taleb olundukda medîne-i mezbûrede Cezerî Kasım mahallesi sükkânından Mehmed Çelebi b. Haydar ve İbrahim Çelebi b. Mehmed ve Mustafa Çelebi b. Süheyl nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka hâlik-i mezbûr Yorgi hâl-i hayâtında dükkân-ı mezkûr içinde mevcûd olan elli bin akçe kıymetli eşyâ gāib-i mezbûrun mülkü olup ve kendi ücret ile tarafından destgâhdâr olduğunu bizim huzûrumuzda bi tav‘ihî ikrâr ve alâ ru’ûsi’l-işhâd bizi işhâd etmişidi, biz hâlik-i mezbûrun vech-i meşrûh üzre ikrârına şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle ve mesmû‘a olmağın mûcebiyle emîn-i mezbûrun eşyâ-i merkūmeden kasr-ı yedine tenbîh birle mâ vaka‘a bi’t-taleb ketb olundu. Fi’s-sâbi‘ ve’l-ışrîn min Şevvâli’l-mükerrem li sene hamsin ve sittîn ve elf. Şuhûdü’l-hâl: Şaban Efendi el-Müderris, Musa Efendi b. Nasuh, Abdi Beşe b. İskender, Hüseyin b. Ali