Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 147 Hüküm no: 146 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Zafiri’nin mülk menzilini Yani v. Nikola’ya bey‘ bi’l-vefâ yoluyla sattığı Vilâyet-i Rumeli’nde Delvine kazâsına tâbi‘ Livne nâm karye sâkinlerinden Yorgi v. Zafiri nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Yani v. Nikola nâm zimmî muvâcehesinde bi tav‘ihî ikrâr ve i‘tirâf edip emlâkimden olup karye-i mezbûrede vâki‘ bir tarafdan İstaro v. Miho? mülkü ve bir tarafdan Yani v. Martin ve bir tarafdan Yako v. Salamon mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve bir kileri ve bir kıt‘a üç göz anbarı ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘iyle mezbûr Yani’ye târih-i kitâbdan üç yüz [28b] gün tamâmına değin üç bin cedîd akçeye bey‘ bi’l-vefâ tarîki üzre bey‘ edip ol dahi minvâl-i meşrûh üzre iştirâ ve kabûl eyleyip semen-i mezkûru merkūm Yani yedinden tamâmen ahz ü kabz eylediğim[den] sonra mebî‘-i mahdûdu mahallinde zabt ve tasarrufa tarafımızdan mersûm Yani’yi taslît eyledim eğer meblağ-ı mezbûru ecel-i mezkûr hulûlünde merkūm Yani’ye edâ ve teslîm etmez isem bey‘-i mezbûr bâtte münkalib olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fî 1 Zilka‘de li sene 1065. Şuhûdü’l-hâl: Dilâver b. Abdullah, Abdi b. İskender, Bayram b. Mehmed, Mustafa b. Mehmed ve gayruhüm mine’l-hâzırîn Niko, Pandazi, Popo Menasi v. Hıristo, Dimo v. Nikomani