Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 148 Hüküm no: 147 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rizo v. Tupi’nin Kalender Hâtun b. Abdülbâki’nin evine hırsızlık amacıyla girdiği iddiasının reddi Medîne-i Ebâ Eyyûb el-Ensârî -dâme fî rıdvâni’l-Bârî-’de Cezerî Kasım mahallesi sâkinelerinden umdetü’l-muhadderât Kalender Hâtun b. Abdülbâkī tarafından da‘vâ-yı âtiyetü’z-zikre vekîli olup mezbûreyi ma‘rifet-i şer‘le ârifân olan Mustafa b. Ali ve Mehmed Beşe b. Osman şehâdetleriyle şer‘an vekâleti sâbite olan Mustafa b. Hasan nâm kimesne meclis-i şer‘-i şerîfde işbu râfi‘ü’s-sifr Rizo v. Tupi nâm zimmî muvâcehesinde üzerine bi’l-vekâle takrîr-i da‘vâ edip mezbûr Rizo medîne-i mezbûrede yoğurtçu tâ’ifesinden olup müvekkilem mezbûre civârında sâkin olmağla ba‘zı hizmet için menziline varır idi lâkin işbu târih-i kitâb günü serika kasdıyla müvekkilem mersûmenin menziline girip odasının kilidini bıçak ile açarken merkūm Rizo ahz olunmuşdur suâl olunup mûcebi icrâ olunmak matlûbumdur dedikde gıbbe’s-suâl merkūm Rizo cevâbında işbu târih-i kitâb günü yava harâccısı beni rencîde eyledikde ben dahi halâs olmak için menzil-i mezbûreye girmişidim deyû ikrâr lâkin serika kasd edip bıçak ile odasının kilidini açarken ahz olunduğunu inkâr edicek müdde‘î-i mezbûrdan müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin fi’l-hakīka menzil-i mezbûrda müvekkile-i merkūmenin odası kapısını serika kasdıyla açmağa sa‘y etmediğine mezbûr Rizo’ya yemîn teklîf olundukda ol dahi alâ hasebi’l-mes’ûl yemîn billâhi’llezî enzele’l-İncîle alâ [İsa] -aleyhi’s-selâm- etmeğin mûcebiyle vekîl-i merkūm Mustafa Beşe bî-vech ta‘arruzdan men‘ olundu. Fî gurreti Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mehmed Efendi b. Nasuh, Mustafa Efendi b. Hasan, Ali Beşe b. Mustafa, Ahmed Beşe b. Hüseyin