Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 148 Hüküm no: 148 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola ile kardeşlerinin Nikola v. Yogo’ya mülk bağlarını sattıkları ve tasarruflarındaki tarlanın tasarruf hakkını devrettikleri Vilâyet-i Rumeli’nde livâ-i Delvine’de Mazarak kazâsına tâbi‘ Plaşota? nâm karyede sâkin Nikola v. ( ) nâm zimmî kendi tarafından asîl ve li ebeveyn er karındaşlar Koca ve Dimo nâm zimmîler tarafından zikr-i âtî bağ ve tarlada olan hisselerini bey‘a ve kabz-ı semene vekîl olup İstati v. Dimo [ve ( )] nâm zimmîler şehâdetleriyle şer‘an vekâleti sâbite olmağın vekâleten meclis-i şer‘-i şerîf-i lâzımü’t-tevkīrde işbu râfi‘ü’l-vesîka Nikola v. Yogo nâm zimmî muvâcehesinde bi’l-asâle ve bi’l-vekâle ikrâr ve i‘tirâf edip emlâkimden olup karye-i mezbûrede vâki‘ bir tarafdan Masnon mülkü ve bir tarafdan vâdi ve iki tarafdan tarîk-i âm ile mahdûd ve mümtâz tahmînen on iki çapalık bir kıt‘a mülk bağımızı ve içinde mevcûd beş dip incir ve iki dip armud ve bir dip meşe eşcârımızı merkūm Nikola’ya üç bin cedîd akçeye bey‘-i kat‘î ile bey‘ edip ol dahi vech-i muharrer üzre iştirâ ve kabûl eyledikden sonra yine mârrü’z-zikr bağ kurbunda vâki‘ hudûdu beynimizde ma‘lûm bir kıt‘a tarlamızın dahi hakk-ı tasarrufunu ma‘rifet-i sâhib-i arz ile mezbûr Niko[la]’ya beş yüz akçe bedel mukābelesinde tefvîz ve ferağ eylediğimde ol dahi tefevvuz ve kabûl eyleyip semen-i mezbûr ile bedel-i mezkûr ki cem‘an üç bin beş yüz akçeyi mersûm Niko[la] yedinden tamâmen ahz ü kabz eylediğimden sonra zikr olunan bağ ve tarlayı mahallinde zabt ve tasarrufa merkūm Niko[la]’yı taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Abdi Beşe b. İskender, Dilâver b. Abdullah, Hüseyin Çelebi b. Ali, Bayram Dede b. Mehmed İstati, Kostantin, Kara Dimo, Kondi, Dimo, Kondi, Miho, Hargâh, Koco, Porgo, Marko, Komni, Kosta, Toya, Yorgo, Zaferi, Niko, Yani