Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 270 Hüküm no: 291 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Reis’in palamut bedelinden Yamandi v. Dimo’daki alacağını kefil Nikola v. Yani’den talep ettiği Nefs-i cezîre-i Midilli sükkânından Mustafa Reis b. Muharrem nâm kimesne tarafından husûs-ı âti’l-beyâna vekîl olduğu Mahmud b. Ahmed ve Kenan b. Abdullah nâm kimesneler şehâdetleri ile şer‘an sâbit olan el-Hâc Mustafa b. Muharrem nâm kimesne meclis-i şer‘-i hatîr-i lâzımü’t-tevkīrde bakkal tâifesinden Nikola v. Yani nâm zimmî muvâcehesinde bi’l-vekâle üzerine da‘vâ ve takrîr-i kelâm edip müvekkil-i merkūm Mustafa Reis’in Havâss-ı refî‘a kazâsına tâbi‘ Küçük Çekmece sükkânından Yamandi v. Dimo nâm zimmî zimmetinde yedinden müşterâ ve makbûz kantarı beynlerinde ma‘lûm palamut bahâsından kırk iki bin dokuz yüz otuz akçe hakkı olup meblağ-ı mezbûrdan mukaddemâ on altı bin dört yüz doksan akçesini merkūm Yamandi yedinden müvekkil-i merkūm Mustafa Reis ahz u kabz edip bâkī yirmi altı bin dört yüz kırk akçesine merkūm Nikola emr-i kabûlü hâviye kefâlet-i sahîha-i şer‘iyye ile kefîl olmuşidi, hâlâ meblağ-ı mezbûru merkūm Nikola’dan kefâletine binâen taleb ederim suâl olunsun dedikde gıbbe’s-suâl ve’l-inkâr vekîl-i merkūmdan müdde‘âsını mübeyyine beyyine taleb olundukda udûl-i müslimînden mahrûse-i Galata’da Arab Câmi-i şerîfi mahallesi sükkânından Hüseyin b. Mustafa ve Yusuf b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müvekkil-i merkūm Mustafa Reis’in merkūm Yamandi zimmetinde beynlerinde ma‘lûm palamut semeninden bâkī yirmi altı bin dört yüz kırk akçe kabzına merkūm Nikola emr ve kabûlü hâviye kefâlet-i sahîha-i şer‘iyye ile bizim huzûrumuzda kefîl olmuşidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Gazanfer b. Tevekkül, İbrahim Çelebi b. Ahmed, Mehmed Çavuş el-Mübâşir, Resul b. Rıdvan ve gayruhüm.