Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 157 Hüküm no: 159 Orijinal metin no: [30b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anagdoşdi? v. Todori’nin mülk bağının Rizo v. Yorgi’ye satılması Vilâyet-i Rumeli’nde Yenişehir kazâsı nevâhîsinden Kuhistân nâhiyesine tâbi‘ Büyük Asova nâm karyede sâkin Anagnoşdi v. Todori nâm zimmî meclis-i şer‘-i şerîfde işbu râfi‘ü’l-vesîka Rizo v. Yorgi nâm zimmî muvâcehesinde tav‘an ikrâr ve i‘tirâf edip emlâkimden olup karye-i mezbûrede Karmıça nâm mevzi‘de vâki‘ bir tarafdan Nikola bağı ve bir tarafdan Teraze Filo bağı ve bir tarafdan Panayot bağı ve bir tarafdan tarîk-i âm ile mahdûd tahmînen on çapalık bir kıt‘a mülk bağımı merkūm Rizo’ya yedi bin beş yüz cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl [31a] eyleyip semeni olan meblağ-ı mezbûr yedi bin beş yüz akçeyi merkūm Rizo yedinden tamâmen ahz ü kabz eylediğimden sonra mebî‘-i mahdûd-ı mezkûru mahallinde zabt ve tasarrufa tarafımdan mersûm Rizo’yu taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Zilka‘deti’ş-şerîfe li sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Hüseyin b. Ali, Abdi b. İskender, Dilâver b. Abdullah, Bayram Sofu Yani, İskarlet, Todori, İsteryanoz, Todori, Mavridi, Todori, Todori, Dimitri, Angelaki, İsteryanaki, Panayot, Kirbaki, Yorgi, Dimitri, Todori, Dimitri ve gayr