Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 158 Hüküm no: 160 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Behram b. Abdullah’ın Mehmed b. Abdullah’ın başına ve koluna balta ile vurarak yaraladığı Medîne-i Ebâ Eyyûb el-Ensârî -dâme fî rıdvâni’l-Bârî-’de Nişâncı Paşa mahallesi sâkinlerinden umdetü’l-eşbâh Süleyman Ağa b. Abdülbâkī meclis-i şer‘-i şerîfde takrîr-i kelâm edip işbu târih-i kitâb günü abd-i memlûküm olan Çerkesiyyü’l-asl Behram b. Abdullah nâm gulâm neccâr tâ’ifesinden olup bundan akdem şeref-i İslâm ile müşerref olan Mehmed b. Abdullah nâm mühtedînin başına ve sağ koluna balta ile bi gayr-ı hakkın darb edip mezbûr Mehmed’i mecrûh eylemişdir kıbel-i şer‘-i şerîfden üzerine varılıp eser-i cerhi keşf ve müşâhede olunmak matlûbumdur dedikde, cânib-i şer‘-i kavîmden fahrü’l-müderrisîn Surûrî Mustafa Efendi irsâl olunup ol dahi zeyl-i kitâbda mastûrü’l-esâmî müslimîn ile üzerine varıp keşf ve nazar olundukda fi’l-hakīka merkūm Mehmed’in başının üç yerinde ve sağ kolunda balta cerhi olduğunu müşâhede ve mu‘âyene eyledim dediklerinden sonra merkūm Mehmed’e cârihin kimdir [deyû] suâl olundukda beni işbu târih-i kitâb günü gulâm-ı mezbûr Behram bi gayr-ı hakkın balta ile başıma ve sağ koluma urup mecrûh eylemişdir dedikde vâki‘ü’l-hâli Mevlânâ-yı müşârun-ileyh mahallinde ketb ü tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mustafa Ağa b. Kalender, Ali Beşe b. Mehmed, Dilâver Bey b. Abdullah, Mustafa Beşe b. Mehmed