Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 158 Hüküm no: 161 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Bey b. Mahmud’un Sinan Beşe’den cebren muhtelif koyun, sığır ve beygiri aldığının tesbiti Vilâyet-i Rumeli’nde Premedi kazâsına tâbi‘ Istarova nâm karye sâkinlerinden işbu râfi‘ü’l-vesîka Sinan Beşe b. Hasan nâm râcil meclis-i şerî’at-i şerîfede vilâyet-i merkūmede Avlonya kasabası sâkinlerinden Yusuf Bey b. Mahmud nâm kimesne tarafından husûs-ı âti’z-zikri mürâfa‘a ve muhâsamaya vekîl olup hasm-ı şer‘î-i câhid mahzarında Mehmed Beşe b. Hasan ve Hasan Beşe b. Abdi şehâdetleriyle şer‘an vekâleti sâbite olan Mustafa Beşe b. Mehmed nâm râcil muvâcehesinde üzerine da‘vâ ve takrîr-i kelâm edip bundan akdem mülk koyunlarım Sinan Paşaoğlu kışlası demekle ma‘rûf mevzi‘de iken mezbûr Yusuf Bey bi gayr-ı vech-i şer‘î üç yüz yirmi koyun ve yirmi beş aded koç ve on beş aded kara sığır ineği ve bir re’s doru bârgirimi ahz ü kabz etmişidi hâlen taleb ederin vekîl-i mesfûrdan suâl olunup mûcebi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i merkūmdan müdde‘âsını mübeyyine beyyine taleb olundukda udûl-i ricâlden olup vilâyet-i merkūmede Arnavud Belgradı’nda Mahkeme mahallesinde sâkinlerinden Ali Bey b. Hasan ve yine zikri mürûr eden Arnavud Belgradı kazâsına tâbi‘ Malagas nâm karye sâkinlerinden Hüseyin Bey b. Yusuf nâm kimesne[ler] li ecli’ş-şehâde meclis-i şer‘a hâzırân olup isre’l-istişhâd fi’l-hakīka müvekkil-i müşârun-ileyh Yusuf müdde‘î-i mezbûr Sinan Beşe’nin zikr olunan koyunlarını ve yirmi beş aded koç ve on beş re’s kara sığır ineğini ve bir doru bârgirini bi gayr-ı vech-i şer‘î bizim huzûrumuzda cebren ahz ü kabz etmişidi biz bu husûsa vech-i muharrer üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle ve mesmû‘a olmağın mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sâdis min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Yusuf Çavuş b. Abdullah el-Mübâşir, Süleyman Efendi b. ( ) el-Müderris, Ahmed Çelebi b. Hüseyin, Süleyman Bey b. Ebîbekir, Abdi Beşe b. İskender