Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 159 Hüküm no: 162 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa’nın tasarrufundaki bostanın kuyusunda bir ceset bulunduğu ve keşfinin yapıldığı Dergâh-ı âlî -dâme mahfûfen bi’l-me‘âlî- kapıcılarından iftihârü’l-emâcid ve’l-ekârim Ahmed Ağa nâm bevvâb-ı sultânînin taht-ı tasarrufunda olup medîne-i Hazret-i Ebâ Eyyûb el-Ensârî -dâme fî rıdvâni’l-Bârî- de Ali Paşa mahallesinde vâki‘ bostanın müste’ciri olan işbu râfi‘ü’l-kitâb Mustafa Beşe b. Abdülbâkī nâm kimesne meclis-i şer‘-i şerîf-i lâzımü’t-tevkīrde takrîr-i kelâm ve ifâde-i merâm edip mârrü’z-zikr bostanda vâki‘ kuyu içinde târih-i kitâb günü bir meyyit bulunmuşdur, kıbel-i şer‘-i şerîfden üzerine varılıp keşf ve nazar olunmak murâdımdır dedikde cânib-i şer‘-i kavîmden fahrü’l-kuzât Mevlânâ Mehmed Efendi b. Nasuh irsâl olunup ol dahi zeyl-i kitâbda mastûretü’l-esâmî müslimîn ile zikr olunan bostana varıp sâlifü’l-beyân kuyudan meyyit-i mezbûru ihrâc eylediklerinden sonra keşf ve nazar olundukda asla bir yerinde eser-i cerhi olmadığı müşâhede ve mu‘âyene olunmağın Mevlânâ-yı mezbûr vâki‘ hâli mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mustafa Efendi b. Mehmed el-İmâm, Mustafa Çelebi b. Mehmed, Mustafa b. Abdullah, el-Hâc İbrahim b. Mehmed, Hüseyin Beşe b. Mahmud, İbrahim Beşe b. Ebîbekir, Mehmed Çelebi b. Davud Efendi, Ali Efendi b. Üveys, Halil Çelebi b. Murtaza, Mustafa Çelebi b. Rıdvan