Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 160 Hüküm no: 163 Orijinal metin no: [31b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Despino bt. Mihal’in mülk bağının Giro’ya satıldığı Havâss-ı aliyye kazâsına tâbi‘ Küçükköy demekle ma‘rûf karyede sâkin iken bundan akdem hâlik olan Duka v. Dimo nâm zimmînin vâlidesi ve bi’l-inhisâr vârisi olup karye-i mezbûre sâkinelerinden Despino bt. Mihal nâm nasrâniye meclis-i şer‘-i şerîf-i lâzımü’t-tevkīrde işbu râfi‘ü’l-vesîka Giro v. Feyo nâm zimmî muvâcehesinde bi tav‘ihâ ikrâr ve i‘tirâf edip silk-i mülk-i sahîhimde münselik olan karye-i mezbûrede vâki‘ bir tarafdan Giro v. Dedo bağı ve bir tarafdan Ruso nâ[m] zimmî çayırı ve bir tarafdan merhûm Sultan Bayezid suyu yolu ve taraf-ı râbi‘i tarîk-i âm ile mahdûd tahmînen üç dönüm bir kıt‘a mülk bağımı merkūm Giro’ya on bir bin beş yüz nakid akçeye tarafeynden îcâb [ve] kabûlü hâvî bey‘-i bâtt-ı sahîh-i şer‘î ile bey‘ ve tesl[î]m ol dahi vech-i meşrûh üzre iştirâ ve kabûl eyleyip eyledikden sonra semeni olan on bir bin beş yüz akçeyi mezbû[r] Giro yedinden tamâ[men] ahz ü kabz eyledim ba‘de’l-yevm mârrü’z-zikr bağımda vechen mine’l-vücûhi’ş-şer‘iyye alâkam yokdur merkūm Giro’nun mülk-i müşterâsı olmuşdur keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-âşir min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Hüseyin b. Ali, Dilâver b. Abdullah, Abdi b. İskender, Bayram b. Mehmed Kero, Dedo, Yorgi, İstati, Dimo, Panko, Estapo, Toto, Panayo, Dimo, Zahri, Yorgi