Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 160 Hüküm no: 164 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Mustafa’nın Hasan Beşe b. Mahmud’un yolunu keserek zorla parasını aldığı Vilâyet-i Rumeli’nde Kalamete kasabasında Mustafa Çelebi mahallesi sükkânından işbu râfi‘ü’l-kitâb Hasan Beşe b. Mahmud nâm kimesne meclis-i şer‘-i şerîf-i lâzımü’t-tevkīrde Ali Bey b. Mustafa nâm kimesne mahzarında üzerine da‘vâ ve takrîr-i kelâm edip târih-i kitâbdan bir sene mukaddem mezbûr Ali Bey kasaba-i merkūmeye hizmet ile geldikde ben dahi kasaba-i mezbûre kurbunda vâki‘ çiftliğime giderken yoluma gelip beni ahz edip benden bi gayr-ı hakkın ücret-i kadem nâmına zulmen elli kıt‘a riyâlî guruşum almışdır, hâlen suâl olunup mârrü’z-zikr elli guruşun alıverilmek murâdımdır dedikde gıbbe’s-suâl ve akībe’l-inkâr müdde‘î-i mezbûr Hasan Beşe’den da‘vâsını mübeyyine beyyine taleb olundukda udûl-i ricâlden olup vilâyet-i Rumeli’nde Moton kazâsına tâbi‘ Yeni Avaran demekle ma‘rûf karyede sâkin Abdurrahman Bey b. Hasan ve Yenihisar’dan Mustafa b. İbrahim nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan bir sene mukaddem vech-i muharrer üzre müdde‘î-i mezbûr Hasan Beşe kasaba-i mezbûreden çiftliğine giderken mezbûr Ali Bey yoluna inip müdde‘î-i mezbûru ahz edip bi gayr-ı hakkın zulmen elli kıt‘a riyâlî guruşunu bizim huzûrumuzda almışdır biz bu husûsa minvâl-i meşrûh üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde eser-i ri‘âyeti şerâ’it-i kabûlihâ şehâdetleri makbûle ve mesmû‘a olmağın mûcebiyle ba‘de’l-hükm mâ hüve’l-vâki‘ bi’l-ibtigā ketb olundu. Fî 9 min Zilka‘deti’ş-şerîfe li sene 1065. Şuhûdü’l-hâl: Fahrü’l-kuzât Sinan Efendi [b.] el-Hâc Derviş, muharrirü’l-vesîka Mehmed Efendi el-Eyyûbî, Mehmed Efendi b. Habil, Ahmed Çelebi b. Mehmed, el-Hâc Mahmud b. Mustafa, Abdi Beşe b. İskender, Dilâver Beşe, Hasan Çelebi, Bayram Dede ve gayruhüm mine’l-hâzırîn