Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 161 Hüküm no: 165 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Polharoni’nin kiraladığı bostan kirası ve bostanda açtırdığı kuyunun masrafı için Bostanzâde Mehmed Efendi ve hemşîresi Fâtıma Hâtun ile olan davalarından karşılıklı vazgeçerek sulh oldukları Dâr-ı hilâfeti’l-aliyye Kostantıniyyetü’l-mahmiyye -hamâha’llâhu te‘âlâ ani’l-beliyye- hısnı ebvâbından Eğrikapı hâricinde sâkin olan Polharoni v. ( ) nâm zimmî meclis-i şer‘-i şerîfde işbu kitâb-ı sıhhat-nisâbın sâhibleri a‘lemü’l-ulemâ’i’l-izâm efdalü’l-fuzalâ[’i]’l-fihâm menba‘u eştâti’l-ulûm ve’l-ma‘ârif nâsıbu râyâti’l-fezâ’il ve’l-avârif yenbû‘ü’l-fezâ’il metbû‘ü’l-efâzıl Bostanzâde Mehmed Efendi hazretleri ve hemşîreleri fahrü’l-muhadderât zahrü’l-muvakkarât Fâtıma Hâtun taraf-ı pür-şereflerinden husûs-ı câ’i’z-zikri tasdîke vekîl olup hasm-ı şer‘î-i câhid mahzarında Yusuf Efendi b. Ebîbekir ve Mustafa Efendi b. Ali şehâdetleriyle şer‘an vekâleti sâbite olan umdetü’l-müderrisîn Ömer Efendi b. Receb el-vekîl mahzarında ikrâr-ı tâm ve takrîr-i kelâm edip zikr olunan Eğrikapı hâricinde ma‘lûmü’l-hudûd ve’l-cevânib bir kıt‘a bostan müvekkilân-ı müşârun-ileyhimânın zabt ve tasarruflarında olmağla bostan-ı mezbûrda ben bir su kuyusu ihdâs ve binâ eyledim, anlar dahi zikri câ’î olan ücretinin ikişer bin akçesini almamak şartıyla bostan-ı merkūm[u] minvâl-i mübeyyen üzre müvekkilân-ı müşârun-ileyhimâ hazretleri târih-i kitâbdan dokuz sene mukaddem yedişer bin akçe ücret ile bana îcâr ve teslîm ben dahi vech-i muharrer üzre istîcâr ve tesellüm eyleyip ba‘dehû bostan-ı mezbûra mâlımla bir su kuyusu ihdâs edip beşer bin akçe icâre-i müeccele ile tasarruf üzre iken müvekkilân-ı müşârun-ileyhimâ benden beşer bin akçeden ziyâde olan ücreti da‘vâ ve taleb eyleyip ben dahi ol kuyuya sarf eylediğim ma‘lûmü’l-mikdâr akçeyi müvekkilân-ı müşârun-ileyhimâdan taleb etmekle beynimizde münâza‘ât-ı kesîre cereyânından sonra vesâtat-i muslihîn ile müvekkilân-ı müşârun-ileyhimâ târih-i kitâb senesi rûz-ı Kasım’ına gelince beşer bin akçeden ziyâdesin merkūme hâsıl olan ücret da‘vâsından fâriğ olup ben dahi ihdâs eylediğim bostan kuyusu bahâsından fâriğ [olmak] üzre beynimizi ıslâh ve tevfîki ben dahi kabûl eylediğimizden sonra müvekkilân-ı müşârun-ileyhimâ zikr olunan ücret da‘vâsından benim zimmetimi ibrâ ve iskāt eyledi ben dahi ihdâs eylediğim bostan kuyusuna sarf olunan ma‘lû[m]ü’l-mikdâr meblağ da‘vâsından müvekkilân-ı müşârun-ileyhimâ hazretlerinin zimmetlerin ibrâ-i âmm-ı kātı‘ü’n-nizâ[‘] ile ibrâ ve iskāt eyledim, ba‘de’l-yevm müvekkilân-ı müşârun-ileyhimâ ile ol bostan kuyusuna müte‘allik vechen mine’l-vücûhi’ş-şer‘i[yye] ve sebeben mine’l-esbâbi’l-mer‘iyye da‘vâ ve nizâ‘ım kalmamışdır dedikde merkūm Polharoni’nin vech-i muharrer üzre cârî ve sâdır olan kelimât-ı mahkiyesini vekîl-i merkūm Ömer Efendi vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Fi’l-yevm ( ) min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Muharrirü’l-hurûf Surûrî Mustafa Efendi, Mehmed Efendi b. Ali, Mehmed Efendi b. Yakub, Cafer Bey b. Abdülbâkī, Mehmed Çelebi b. Mahmud