Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 162 Hüküm no: 166 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Senap’ın vârislerine intikal eden tasarrufundaki vakıf menzilin vârisler arasında taksîm edilmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm İslâm Bey mahallesi sâkinlerinden olup bundan akdem hâlik olan Kirkor v. Senap nâm Ermeni’nin verâseti sulbî kebîr oğulları Haron nâm Ermeni ile merkūm Kirkor’un helâkinden sonra şeref-i İslâm ile müşerref olan Mustafa’ya ve sulbiye kebîre kızı Bergade nâm nasrâniyeye münhasıra olduğu şer‘an zâhir ve müte‘ayyin oldukdan sonra mezbûr Haron Ermeni meclis-i şer‘-i şerîf-i enver-i lâzımü’t-teşrîfde ikrâr-ı tâm ve takrîr-i kelâm edip mahrûse-i İstanbul’da merhûm Çavuşbaşı Ali Ağa Vakfı’ndan olup mahalle-i merkūmede vâki‘ tarafeyn-i vakf-ı mezbûr ve bir tarafı merhûm Ahmed Efendi veresesi mülkü ve bir tarafı tarîk-i âm ile mahdûd olup tahtânî beş bâb odaları ve kenîfi müştemil olan vakıf menzil icâre-i mu‘accele-i ma‘lûme ve ücret-i müeccele ile babamız hâlik-i merkūmun tasarrufunda olup ba‘de helâkihî intikāl-i âdî ile bize intikāl edip biz dahi ale’ş-şeriketi’s-seviy tasarruf üzre idik, lâkin birbirimiz[e] ta‘arruzdan hâlî olma[ma]ğla hâlen kıbel-i şer‘-i kavîmden üzerine varılıp rızâlarımız ile her birimizin hissesin ta‘yîn olunmak matlûbumuzdur dedikde kıbel-i şer‘-i şerîfden umdetü’l-kuzâti’l-İslâm Mevlânâ Mehmed Efendi irsâl olunup ol dahi hâssa mi‘mârlarından üstâd Mehmed b. Abdülbâkī ve zeyl-i vesîkada mastûrü’l-esâmî müslimîn ile menzil-i mezbûra varıp akd-i meclis-i şer‘ olundukdan sonra mi‘mâr-ı mezbûr mesâha ve takvîm eyledikde tûlen ve arzan bi hesâb-ı satrancî altmış zirâ‘ arsa üzerinde binâ olunan bir kebîr ve bir sagīr oda mezbûr Haron’un hissesine ta‘yîn olunup yine tûlen ve arzan bi hesâb-ı satrancî altmış zirâ‘ arsa üzerinde mebnî bir bâb tahtânî oda ile otuz bir zirâ‘ arsa-i hâliye merkūme Bergade’nin hissesine ta‘yîn ve yine tûlen ve arzan bi hesâbi’l-mezbûr doksan bir zirâ‘ arsa üzerinde binâ olunan bir bâb kebîr ve bir bâb sagīr oda merkūm mühtedî Mustafa’nın hissesine ta‘yîn olundukdan sonra her biri rızâsıyla hisse-i ma‘hûde-i ma‘lûmelerini kabz ve alâmet-i fâsıla vaz‘ eylediklerini Mevlânâ-yı müşârun-ileyh mahallinde ketb ve tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ alâ hâze’l-minvâl bi’t-taleb ketb olundu. [32b] Fi’l-yevmi’l-hâmis min Zilka‘deti’ş-şerîfe min şuhûri sene hamsin ve sittîn ba‘de’l-elf mine’l-hicreti’n-nebeviyye. Şuhûdü’l-hâl: Mehmed Beşe b. Abdullah, Mustafa Beşe b. Mehmed, diğer Mehmed Beşe b. Abdülbâkī, Ali Beşe b. Mustafa, Hüseyin Beşe b. Ali ve gayruhüm mine’l-hâzırîn