Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 163 Hüküm no: 167 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi ile Perakob’un sattıkları kürk bedelinden alacakları olduğu Vilâyet-i Rumeli’nde cezîre-i Mora’da Ayapetre kazâsına tâbi‘ Ayayani nâm karye sâkinlerinden olup hâlen mahmiye-i İstanbul’da kürkçü tâ’ifesinden olan Yorgi v. Panayot ve mahrûse-i Galata tevâbi‘inden kasaba-i Beşiktaş’da Sinan Paşa mahallesi sükkânından olup yine tâ’ife-i mezbûreden Perakob v. Kiryaki nâm zimmîler meclis-i şer‘-i şerîf-i lâzımü’t-tevkīrde vilâyet-i mezbûrede vâki‘ İbrâil kazâsı keferesi metrepolidi olan Meledyoz? v. Kostantin nâm râhib muvâcehesinde her biri üzerine da‘vâ ve takrîr-i kelâm edip târih-i kitâbdan on yedi sene mukaddem merkūm Meledyoz’a iki tahta sırt samur kürkümüzü dokuz yüz kıt‘a riyâlî kebîr guruşa bey‘-i kat‘î ile bey‘ ve teslîm ol dahi vech-i mübeyyen üzre iştirâ ve tesellüm ve kabûl ve kabz edip semeni olan mârrü’z-zikr dokuz yüz guruş zimmetinde kalmışdır, hâlen zikr olunan guruşu mersûm Meledyoz’dan taleb eylediğimizde edâdan imtinâ‘ eder suâl olunsun dedikde gıbbe’s-suâl merkūm Meledyoz cevâbında fi’l-hakīka târih-i kitâbdan on yedi sene mukaddem müdde‘iyân-ı mezbûrân Yorgi ve Perakob sâlifü’l-beyân kürkü vech-i muharrer üzre bana meblağu’l-merkūmü’l-vasf dokuz yüz guruşa bey‘ ve teslîm ben dahi iştirâ ve tesellüm ve kabz ve kabûl eylediğimden sonra semeni olan mârrü’z-zikr dokuz yüz guruş zimmetimde kalmışidi hâlen müdde‘iyân-ı merkūmâna meblağ-ı mezkûr dokuz yüz guruş zimmetimde lâzımü’l-edâ ve vâcibü’l-kazâ deynim vardır deyû tav‘an ikrâr ve i‘tirâf etmeğin ikrârı mûcebince müdde‘iyân-ı merkūmâna zikr olunan dokuz yüz guruşu edâsıyla mersûm Meledyoz? ilzâm olunup mâ hüve’l-vâki‘ bi’t-taleb ketb olundu. Fi’l-yevmi’l-âşir min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Receb Çavuş b. Abdullah, Mehmed Çelebi b. Hızır, Ali b. Ömer, Mehmed Çelebi b. Hüsrev, İbrahim Çelebi b. Mehmed el-Attâr, Mustafa Çelebi b. Süheyl, Ahmed Çelebi b. Mehmed el-Mukayyid, muharrirü’l-hurûf Mehmed Efendi b. Nasuh, Abdi Beşe b. İskender, Hüseyin Çelebi b. Ali, Dilâver Beşe b. Abdullah