Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 164 Hüküm no: 168 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun mülk menzili ile bağını Tanaş v. Yorgi’ye sattığı Vilâyet-i Rumeli’nde Badracık kazâsına tâbi‘ Zemtani nâm karye sâkinlerinden Yani v. Dimo nâm hayyât zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Tanaş v. Yorgi nâm zimmî muvâcehesinde tâyi‘an ikrâr ve i‘tirâf etmeğin emlâkimden olup karye-i mezbûrede vâki‘ bir tarafdan mezbûr Tanaş mülkü ve etrâf-ı selâseden tarîk-i âm ile mahdûd bir bâb tahtânî odayı ve cüneyneyi müştemil mülk menzilimi cemî‘ tevâbi‘iyle ve yine karye-i mezbûre kurbunda Kuril? nâm mevzi‘de vâki‘ etrâf-ı erba‘adan Yani, Karpaç ve Estamo Karfil ve Pagonaki nâm zimmîler bağları ve orman ile mahdûd tahmînen iki çapalık bir kıt‘a mülk bağımı dahi merkūm Tanaş’a iki bin cedîd akçeye bey‘-i kat‘î ile bey‘ edip ol dahi vech-i meşrûh üzre iştirâ ve kabûl eyleyip semeni olan meblağ-ı mârrü’z-zikr iki bin akçeyi mersûm Tanaş yedinden tamâ[men] ahz ü kabz eylediğimden sonra mebî‘ayn-i mezkûreyni mahallinde zabt ve tasarrufa merkūm Tanaş’ı tarafımdan taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Ali b. Mustafa, Hüseyin b. Ali, Bayram b. Mehmed, Mustafa b. Mehmed, Dilâver b. Abdullah Polo, İsnayko, Dimo, Perşeke?, Yanako, Yorgi, Todor, Perşeke?, Draso, Leşteli, Todori, İstapo