Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 271 Hüküm no: 293 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Küçük oğlunu itip ölümüne yol açan çocuğun babasını kasıt gerekçesiyle şikâyet eden Mehmed b. Mustafa’nın iddiasını ispat edemediği Mahmiye-i İstanbul’da Sultan Selim Hân aleyhi’r-rahmetü ve’l-gufrân câmi‘-i şerîfi ve ma‘bed-i latîfi kurbunda vâki‘ Çukurbostan mahallesi sükkânından Mehmed b. Mustafa nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde bâ‘isü’l-kitâb el-Hâc Ma‘tuk b. Abdülvehhâb nâm kimesne mahzarında üzerine da‘vâ ve takrîr-i kelâm edip mezbûr Hacı Ma‘tuk’un emri ile sagīr oğlu Şaban üç yaşında ve benim sagīr oğlum Mustafa’yı mezbûr el-Hâc Ma‘tuk’un menzili nerdübânından itiverip yere düşürüp a‘zâsı kara-bere olup müte’essiren fevt olmuşidi suâl olunup ihkāk-ı hak olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr el-Hâc Ma‘tuk’a vech-i şer‘î üzre yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sânî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Emîrü’l-ümerâ’i’l-kirâm kebîrü’l-küberâi’l-fihâm defterdâr Mehmed Paşa, umdetü’l-eşbâh ve’l-ekfâ Çavuşbaşı İsmail Ağa, fahrü’l-akrân ve’l-ikfâ muhzırbaşı Şaban Ağa, umdetü’l-emâsil ve’l-eşbâh Eyüb Ağa Kethüdâ-yı hazret-i efendi.