Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 165 Hüküm no: 170 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Himmet Beşe’nin Hacı Mustafa’ya mülk çiftliğini içindekilerle birlikte sattığı ve tasarrufundaki vakıf tarlaları devrettiği Dârü’s-saltanati’l-aliyye Kostantıniyyetü’l-mahmiyye mahallâtından Nahılbend mahallesi sâkinlerinden Himmet Beşe b. Mustafa nâm kimesne meclis-i şer‘-i şerîf-i lâzımü’t-teşrîfde el-Hâc Mustafa b. Ahmed nâm cündî muvâcehesinde bi tav‘in sâf ikrâr ve i‘tirâf edip Havâss-ı refî‘a -hamâha’llâhu te‘âlâ ani’l-beliyye- kazâsına tâbi‘ Terkos nâhiyesi muzâfâtından Türkşe demekle ma‘rûfe karyede vâki‘ bir tarafı Hasan Ağa b. Mehmed mülkü ve bir tarafdan Topal Mustafa Beşe mülkü ve bir tarafdan bağ ve bir tarafdan tarîk-i âm ile mahdûd fevkānî iki bâb odaları ve bir çatma odayı ve bir ahırı ve bir anbarı ve bir su kuyusunu ve zât-ı eşcâr-ı müsmire ve gayr-ı müsmire bahçeyi ve bir kıt‘a bağı müştemil olup çiftlik ta‘bîr olunur mülk menzilimi ve içinde mevcûd iki çift kara sığırı öküzü ve iki kara sığırı ineği ve iki kara sığırı danası ve iki aded arabamı ve âlât-ı zirâ‘at ve esvâb-ı hirâseti bi safkatin vâhidetin mezbûr el-Hâc Mustafa Bey’e bey‘-i bâtt-ı sahîh-i şer‘î ile kırk dört bin cedîd akçeye bey‘ ve teslîm ol dahi minvâl-i mübeyyen üzre iştirâ ve tesellüm ve kabz ve kabûl eyledikden sonra yine karye-i mezbûrede mevâzi‘-i adîde[de] vâki‘ olup çiftlik-i mezbûr[a] intimâ’ ile tahdîd ve tavsîfden müstağnî olan on üç kıt‘a tarla ve altı kıt‘a çayırlarımın hakk-ı tasarruflarını [mer]hûm Gāzi Sultan Mehmed Hân -aleyhi’r-rahmetü ve’l-gufrân- hazretlerinin evkāfı arâzisinden olmağla mütevellîsi ma‘rifetiyle mezbûr el-Hâc Mustafa Bey’e altı bin akçe bedel mukābelesinde tefvîz bi’l-ferağ eylediğimde ol dahi vech-i muharrer üzre tefevvuz ve kabûl etmekle semen-i merkūm ile bedel-i mezbûr cem‘an elli bin akçeyi müşârun-ileyh el-Hâc Mustafa Bey yedinden tamâmen ahz ü kabz eyledim ba‘de’l-yevm ol çiftlikde vechen mine’l-vücûh benim alâka ve medhalim yokdur mezbûr el-Hâc Mustafa Bey mülken ve tefevvuzen keyfemâ yeşâ [ve] yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Süleyman Bey b. Mustafa Paşa, Mustafa Bey b. Mehmed Paşa, İbrahim Ağa b. Ahmed, Hasan Ağa b. Abdullah, Kasım Efendi b. Mehmed el-İmâm, Mehmed Efendi el-İmâm, Yusuf Bey b. Abdullah, Dilâver Bey b. Abdullah, Şâhin Bey b. Abdullah, Kenan Bey b. Abdullah