Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 167 Hüküm no: 172 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Yahya ile zevcesi Şemsihân Hâtun bt. Mehmed’in mülk menzillerini Hasan Bey b. Mehmed’e sattıkları Medîne-i Hazret-i Ebâ Eyyûb el-Ensârî -aleyhi rahmetü’l-Bârî- mahallâtından Nişâncı Paşa mahallesi sâkinlerinden Mahmud b. Yahya nâm kimesne ile zevcesi Şemsihân Hâtun bt. Mehmed meclis-i şer‘-i şerîf-i lâzımü’t-tevkīrde işbu sâhibü’l-kitâb Hasan Bey b. Mehmed nâm cündî mahzarında her biri tâyi‘an ikrâr ve i‘tirâf edip silk-i mülkümüzde münselik olup mahalle-i mezbûrede vâki‘ bir tarafdan el-Hâc Hüseyin Bey mülkü ve bir tarafdan mezbûr Nişâncı Paşa Vakfı’ndan olan menzil ve bir tarafdan tarîk-i âm ve bir tarafdan tarîk-i hâs ile mahdûd iki bâb fevkānî odaları ve dehlizi ve altında ahırı ve bir su kuyusunu ve kenîfi ve zât-ı eşcâr-ı müsmire ve gayr-ı müsmire hadîkayı müştemil olan mülk menzilimizi bi cümleti’t-tevâbi‘ ve’l-levâhık mezbûr Hasan Bey’e on üç bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vechi muharrer üzre iştirâ ve tesellüm ve kabz ve kabûl eyledikden sonra semen-i mârrü’z-zikr on üç bin akçeyi mezbûr Hasan Bey yedinden bi’t-tamâm ahz ü kabz eyledik min ba‘d menzil-i mahdûd-ı mezkûrda vechen mine’l-vücûhi’ş-şer‘iyye alâka ve medhalimiz kalmadı mezbûr Hasan Bey’in mülk-i müşterâsıdır keyfemâ yeşâ ve hasbemâ yehtâr mutasarrıf olsun dediklerinde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min Zilka‘deti’ş-şerîfe sene hamsin ve sittîn ve elf. Şuhûdü’l-hâl: Mehmed Efendi b. Nasuh el-İmâm, Selim Halîfe b. Abdullah el-Müezzin, Mehmed Bey b. Musa, Mustafa b. Şaban, Aydın b. Kasım, Ramazan b. Ali, Ahmed b. Mustafa, Ali Bey b. Kasım