Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 168 Hüküm no: 173 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Yani v. Nikola’nın Serkis v. Karabet’e sattığı ekmek bedelinden alacağını talep ettiği Habbâz tâ’ifesinden işbu râfi‘ü’s-sifri’ş-şer‘î Yani v. Nikola nâm nasrânî meclis-i şer‘-i şerîf-i lâzımü’t-teşrîfde yine tâ’ife-i merkūmeden Serkis v. Karabet nâm Ermeni muvâcehesinde üzerine da‘vâ ve takrîr-i kelâm edip merkūm Serkis zimmetinde yedimden müşterâ ve makbûz hubz semeninden ba‘de küllî hesâb yedi bin beş yüz cedîd akçe hakkım olup hattâ şuhûd huzûrunda çetele kesip yedime vermişiken hâlen [taleb] eylediğimde edâdan imtinâ‘ eder, suâl olunsun dedikde gıbbe’s-suâl mezbûr Serkis cevâbında fi’l-hakīka müdde‘î-i mezbûr Yani’ye vech-i mübeyyen üzre hubz bahâsından bir mikdâr akçe deynim olup bundan akdem hesâb ve kitâb eylediğimizde ba‘de küllî hesâb zimmetimde ancak beş bin akçe hakkı bâkī kalmış iken şuhûd huzûrunda kâziben yedi bin beş yüz akçe deynim vardır deyû ikrâr edip yedine çetele kesip vermişidim deyicek, bu husûsda alâ kavli’l-mu‘teberi’l-me’hûz müdde‘î-i mezbûr Yani’ye yemîn tevcîh etmeğin merkūm Yani dahi mukırr-ı merkūm Serkis’in ikrârında kâzib olmadığına yemîn teklîf olundukda mersûm Yani yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle meblağ-ı mezbûr [34a] yedi bin beş yüz akçeyi müdde‘î-i mezbûr Yani’ye tamâmen edâ ve teslîme merkūm Serkis üzerine hüküm ve kazâ olunup ol vechile mersûm Serkis bî-vech ta‘arruzdan men‘ birle mâ hüve’l-vâki‘ gıbbe’t-taleb ketb olundu. Fi’l-yevmi’s-sâlis aşer min Şevvâli’l-mükerrem li sene hamsin ve sittîn ba‘de elf. Şuhûdü’l-hâl: Mustafa Çelebi b. Mehmed, Mustafa Efendi el-Müderris, Mehmed Efendi el-Kadı, diğer Mehmed Efendi el-Kadı