Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 168 Hüküm no: 174 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hâtun bt. Hasan’ın mülk menzilini Yahuda v. Yerhayam ile Mosi v. İsak’a sattığı Havâss-ı aliyye kazâsına tâbi‘ kasaba-i Hasköy mahallâtından Pîrîpaşa mahallesi sâkinelerinden Râbia Hâtun bt. Hasan meclis-i şerî’at-i şerîfede işbu râfi‘ayi’l-vesîka Eğriboz cemâ‘atinden Yahuda v. Yerhayam nâm Yahudi ile Portugal cemâ‘atinden Mosi v. İsak nâm Yahudi muvâcehelerinde bi tav‘ihâ ikrâr ve i‘tirâf edip silk-i mülk-i sahîhimde münselik olup mahalle-i mezbûrede vâki‘ bir tarafdan Avram v. David mülkü ve bir tarafdan Belkıs Hâtun bt. ( ) mülkü ve bir tarafdan Defterdâr Mahmud Çelebi bahçesi ve bir tarafdan tarîk-i âm ile mahdûd fevkānî ve tahtânî iki bâb odaları ve bir su kuyusunu ve zât-ı eşcâr-ı müsmire ve gayr-ı müsmire bahçeyi müştemil mülk menzilimi bey‘-i bâtt-ı sahîh-i şer‘î ile mezbûrân Yahuda ve Mosi’ye yirmi bir bin akçeye bâtten bey‘ ve teslîm ol dahi vech-i meşrûh üzre iştirâ ve tesellüm ve kabz ve kabûl eyledikden sonra semen-i mârrü’z-zikr yirmi bir bin akçeyi merkūmân yedlerinden tamâmen ahz ü kabz eyledim ba‘de’l-yevm menzil-i mahdûd-ı mezkûrda vechen mine’l-vücûhi’ş-şer[‘iyye] alâkam kalmadı mezbûrân Yahuda ve Mosi’nın mülk-i müşterâları olmuşdur keyfemâ yeşâ’ân ve hasbemâ yehtârân her biri mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-hâmis aşer min Zilka‘deti’ş-şerîfe sene [10]65. Şuhûdü’l-hâl: Ömer Efendi b. Ramazan el-İmâm, Mehmed b. Mehmed, Hasan b. Abdullah, Yusuf b. Mustafa el-Bevvâb, Ali Bey b. Abdullah el-Bevvâb, Fazlullah Çelebi b. ( ), İbrahim Bey b. ( ).