Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 169 Hüküm no: 175 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Servinaz bt. Abdullah’ın mülk menzilini Mustafa Çelebi b. Cafer’e sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Nişâncı mahallesi sâkinelerinden Servinaz bt. Abdullah nâm hâtun mahfil-i kazâda işbu râfi‘ü’l-kitâb Mustafa Çelebi b. Cafer nâm kimesnenin li ebeveyn karındaşı ve husûs-ı câ’i’z-zikri tasdîke vekîl-i sâbitü’l-vekâlesi olan Hüseyin Çelebi nâm kimesne muvâcehesinde tav‘an ikrâr ve i‘tirâf edip silk-i mülk-i sahîhimde muntazam olup mahalle-i merkūmede vâki‘ bir tarafdan Topal Yusuf mutasarrıf olduğu vakıf menzil ve bir tarafdan Medîne-i Münevvere Vakfı ve bir tarafdan Mustafa Çelebi b. Ali mülkü ve bir tarafdan tarîk-i âm ile mahdûd olup fevkānî bir bâb ve bir tahtânî odaları ve bir çatma odayı ve havluyu ve muhavvatayı ve kenîfi müştemil olan mülk menzilimi müvekkil-i mezbûr Mustafa Çelebi’ye on iki bin cedîd akçeye tarafeynden îcâb ve kabûlü hâvî bey‘-i kat‘î ile bâtten bey‘ ve teslîm ol dahi vech-i mübeyyen üzre iştirâ ve tesellüm ve kabz ve kabûl eyledikden sonra semen-i mezbûr on iki bin akçeyi müvekkil-i müşârun-ileyh yedinden tamâmen ahz ü kabz eyledim, ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye benim alâka ve medhalim yokdur müvekkil-i müşârun-ileyh Mustafa Çelebi’nin mülk-i müşterâsı olmuşdur keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mehmed Efendi el-İmâm, Selim Dede el-Müezzin, Mehmed Efendi el-Hatîb, Mahmud Bey b. Abdülbâkī, Mustafa Çelebi b. İbrahim, Şaban Efendi b. Hüseyin el-Müderris, Mehmed Efendi b. Nasuh el-Kadı, Mehmed Bey b. Musa, Ali b. Kasım ve gayr