Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 171 Hüküm no: 177 Orijinal metin no: [35a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Despino bt. Mihal’in mülk menzili ile bağının Yorgi v. Göni’ye satılması Havâss-ı Kostantıniyye kazâsına tâbi‘ Küçük nâm karye sâkinelerinden Despino bt. Mihal nâm nasrâniye meclis-i şer‘-i şerîf-i lâzımü’t-teşrîfde işbu râfi‘ü’s-sifr Yorgi v. Göni nâm nasrânî muvâcehesinde ikrâr ve i‘tirâf edip karye-i mezbûr[e]de vâki‘ bir tarafı Peska v. Yani mülkü ve bir tarafı Giro v. Felyo nâm nasrânî mülkü ve bir tarafı Giro v. Dedozi mülkü ve bir tarafı tarîk-i âm ile mahdûd iki bâb tahtânî odaları ve bir sofayı ve havluyu müştemil olan mülk menzilimi ve yine karye-i merkūmede vâki‘ bir tarafdan Ruso bağı ve bir tarafdan Apostol v. Dimo nâm nasrânî bağı ve bir tarafdan Lanbornos v. Yorgi bağı ve bir tarafdan tarîk-i âm ile mahdûd tahmînen bir buçuk dönüm bir kıt‘a mülk bağımı dahi bi safkatin vâhidetin merkūm Yorgi’ye bey‘-i kat‘î ile on beş bin iki yüz cedîd akçeye bâtten bey‘ ve teslîm ol dahi vech-i mübeyyen üzre iştirâ ve kabûl ve tesellüm eyledikden sonra semeni olan meblağ-ı mezbûr on beş bin iki yüz akçeyi merkūm Yorgi yedinden tamâmen ahz ü kabz eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mustafa Beşe b. Mehmed, Ali Beşe b. Mustafa, Hüseyin Beşe b. Ali, Ta‘bezi? v. Yorgi, Dimo v. Yanko, Yani v. Nikola, Kir v. Kalender, İstato v. Noş