Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 172 Hüküm no: 178 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi’nin mülk samanlığının Yani v. Oyori’ye satılması Vilâyet-i Rumeli’nde İnebahtı sancağında Yacağaç kazâsı tevâbi‘inden Panco nâm karye ahâlîsinden Yani v. Yorgi nâm nasrânî meclis-i şer‘-i şerîf-i lâzımü’t-teşrîfde işbu râfi‘ü’s-sifr Yani v. Oyori nâm zimmî muvâcehesinde bi’t-tav‘ ve’r-rızâ ikrâr ve i‘tirâf edip karye-i merkūmede vâki‘ bir tarafı Berirek v. Kaş nâm nasrânî mülkü ve bir tarafı Kosta v. Aleksi nâm zimmî mülkü ve bir tarafı Yani v. Meleka nâm nasrânî mülkü ve bir tarafı tarîk-i âm ile mahdûd olup bir mikdâr arsayı müştemil olan bir kıt‘a mülk samanlığı mesfûr Yani’ye bey‘-i kat‘î ile bin cedîd akçeye bâtten bey‘ ve teslîm ol dahi minvâl-i mübeyyen üzre iştirâ ve tesellüm ve kabz ve kabûl eyleyip semen-i mezbûru yedinden tamâmen ahz ü kabz eylediğimden sonra mebî‘-i mezkûr-ı mahdûdu mahallinde zabt ve tasarrufa merkūm Yani’yi taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mustafa Beşe b. Mehmed, Ali Beşe b. Mehmed, Hüseyin Beşe b. Ali, Bayram Beşe b. Mehmed, Dimo [v.] Nikola, Yani v. Nikola, Duka v. …?, Yorgo v. Dimo, Olonoya v. Yorgi, Rizo v. İstemad