Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 172 Hüküm no: 179 Orijinal metin no: [35a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Haran’ın mülk bağının İstati v. Yani’ye satılması Vilâyet-i Rumeli’nde İnebahtı sancağında Yacağaç kazâsına tâbi‘ Panco nâm karye ahâlîsinden Yani v. Haran nâm zimmî meclis-i şer‘-i hatîr-i lâzımü’t-tevkīrde işbu râfi‘ü’s-sifr İstati v. Yani nâm nasrânî muvâcehesinde bi’t-tav‘i’s-sâf ikrâr ve i‘tirâf edip karye-i mezbûrede Aşağı Bağlar demekle ma‘rûf mevzi‘de vâki‘ bir tarafdan vâdi ve bir tarafdan Tonde v. Yorgo nâm zimmî bağı ve bir tarafdan Dimo v. Manol bağı ve bir tarafdan tarîk-i âm ile mahdûd olup tahmînen yirmi çapalık bir kıt‘a mülk bağımı merkūm İstati’ye bey‘-i kat‘î ile dört bin cedîd akçeye bey‘ edip ol dahi vech-i mübeyyen üzre iştirâ ve kabûl eyleyip semen-i cârru’z-zikri yedinden tamâmen ahz ü kabz eyledim dendikden sonra mebî‘-i mahdûd-ı mezkûru mahallinde zabt ve tasarrufa merkūm İstati’yi taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Ali Beşe b. Mustafa, Mustafa Beşe b. Mehmed, Abdi Beşe b. İskender, Manol [v.] Yorgi, Rizo [v.] Yani, Yani [v.] Dimo, Ostoye? [v.] Divri, Yorgo [v.] Dimo, Hıristo [v.] Yani, Duka [v.] Musafer, Dimo [v.] Manol