Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 173 Hüküm no: 180 Orijinal metin no: [35b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mehmed’in mülk menzilinin vârisleri tarafından es-Seyyid Ali b. es-Seyyid İbrahim’e satıldığı Mahrûse-i İstanbul’da Küçük Ayasofya mahallesi sâkinelerinden iken bundan akdem fevt olan Âişe bt. Mehmed nâm müteve[ffâ]nın verâseti sadrî kebîr oğlu Mehmed b. Mustafa nâm kimesne ile sadriye kebîre kızı Fâtıma nâm hâtuna münhasıra olduğu şer‘an zâhir ve müte‘ayyin oldukdan sonra mezbûr Mehmed asâleten ve merkūme Fâtıma’nın zevci ve tarafından zikr-i âtî menzilde olan sülüs hisse-i şer‘iyyesini bey‘a ve kabz-ı semene vekîli olup mezbûrenin zâtını ma‘rifet-i şer‘iyye ile ârifân olan Mansur b. Mustafa ve el-Hâc ( ) b. Hasan şehâdetleriyle şer‘an vekâleti sâbite olan Ahmed Çelebi b. Ömer nâm kimesne vekâleten meclis-i şer‘-i şerîf-i lâzımü’t-tevkīrde işbu sâhibü’l-kitâb es-Seyyid Ali b. es-Seyyid İbrahim nâm kimesnenin vâlidesi tarafından ikrâr-ı câ’i’z-zikri tasdîke vekîl olup bimâ hüve nehcü’s-sübût şer‘an vekâleti sâbite olan Fâtıma bt. Ali nâm hâtun mahzarında her biri bi’l-asâle ve bi’l-vekâle ikrâr ve i‘tirâf edip mûrisimiz müteveffât-ı mezbûrenin metrûkâtından olup medîne-i Hazret-i Ebâ Eyyûb el-Ensârî’de Çavuş Kasım mahallesinde vâki‘ bir tarafdan Mehmed b. Ahmed mülkü ve bir tarafdan ba‘zan Hasan Efendi mülkü ve ba‘zan Emine Hâtun Vakfı ve iki tarafdan tarîk-i âm ile mahdûd iki bâb tahtânî odaları ve bir su kuyusunu ve kenîfi ve zât-ı eşcârı müsmire ve gayr-ı müsmire bahçeyi müştemil mülk menzilimizi cemî‘ tevâbi‘iyle mezbûr es-Seyyid Ali’ye on sekiz bin cedîd akçeye bey‘-i kat‘î ile bey‘ ve teslîm ol dahi vech-i muharrer üzre iştir[â] ve kabz ve tesellüm ve kabûl eyledikden sonra semen-i mârrü’z-zikri müvekkil-i mezbûr Ali yedinden tamâ[men] ahz ü kabz eyledik ba‘de’l-yevm menzil-i mezkûr müvekkil-i mezbûr Ali’nin mülk-i müşterâsıdır keyfemâ yeşâ ve yehtâr mutasarrıf olsun dediklerinde mukırrân-ı merkūmânın asâleten ve vekâleten cârî ve sâdır olan ikrârlarını vekîl-i merkūme Fâtıma Hâtun vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Hüseyin Efendi b. Mehmed el-İmâm, Hasan Efendi b. Mansur, Şaban Efendi b. Ebîbekir, Mehmed b. Hızır?, Ali Çelebi b. Murtaza