Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 173 Hüküm no: 181 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dede Beşe’nin Alibeyköy’deki çiftliğinin içindekilerle birlikte vârisleri tarafından Bedahşân Hâtun bt. Abdullah’a satıldığı Havâss-ı refî‘a kazâsı tevâbi‘inden Alibeyköyü demekle ma‘rûfe karye sâkinlerinden olup bundan akdem fevt olan Dede Beşe b. ( ) nâm müteveffânın verâseti sulbiye kebîr oğulları Ali ve Ahmed nâm kimesnelere münhasıra olup kable’l-kısme mezbûr Ali dahi fevt olup verâseti zevce-i metrûkesi Sa‘âdet Hâtun bt. Yakub ile li ebeveyn er karındaşı merkūm Ahmed’e münhasıra olduğu şer‘an zâhir ve müte‘ayyin oldukdan sonra merkūmân Ahmed ve Sa‘âdet taraflarından bey‘-i câ’i’z-zikri ikrâra vekîl olup karye-i merkūme ahâlîsinden Hüseyin b. Hasan ve Hasan b. Yusuf nâm kimesneler şehâdetleriyle şer‘an vekâleti sâbite olan Mehmed Beşe b. Bayram nâm kimesne meclis-i şer‘-i şerîf-i lâzımü’t-teşrîfde işbu hâmiletü’l-kitâb Bedahşân Hâtun bt. Abdullah muvâcehesinde bi’l-vekâle ikrâr ve i‘tirâf edip müteveffâ-yı evvelin muhallefâtından olup karye-i mersûmede vâki‘ bir tarafı Ahmed Çelebi b. Mehmed mülkü ve bir tarafı İmâmzâde Çelebi mülkü ve bir tarafı Mehmed Beşe b. Hasan mülkü ve bir tarafı tarîk-i âm ile mahdûd fevkānî ve tahtânî üç bâb odaları ve iki sofa ve iki ahırı ve bir fırını ve zât-ı eşcârı müsmire ve gayr-ı müsmire hadîkayı müştemil olup çiftlik ta‘bîr olunur mülk-i mevrûs menzilimizi ve içinde mevcûd on aded kara sığırı ineği ve bir çift kara sığırı öküzü ve bir araba ve sâir âlât-ı zirâ‘at ve esvâb-ı hirâsetimizi merkūme Bedahşân Hâtun’a bey‘-i bâtt-ı sahîh-i şer‘î ile bi safkatin vâhidetin yirmi bir bin cedîd akçeye bey‘ [ve] teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr yirmi bir bin akçeyi merkūme Bedahşân Hâtun yedinden tamâmen ahz ü kabz eyledik ba‘de’l-yevm mârrü’z-zikr çiftlikde vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye bizim alâka ve medhalimiz yokdur merkūme Bedahşân Hâtun’un mülk-i müşterâsı olmuşdur keyfemâ teşâ ve hasbemâ tehtâr mutasarrıfe olsun dediler dedikde vekîl-i merkūm Mehmed Beşe’nin bi’l-vekâle ferevân? eden kelimât-ı mahkiyesini merkūme Bedahşân Hâtun bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb? ketb olundu. Fi’l-yevmi’s-sâbi‘ aşer min Zilka‘deti’ş-şerîfe min şuhûri sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Ramazan Halîfe b. Hüseyin el-İmâm, İsmail Çelebi b. Mahmud, Hasan Beşe b. Abdullah, Mustafa Bey b. Yusuf, el-Hâc Mehmed Bey b. Davud, el-Hâc Receb b. Fazlullah, Mehmed Beşe b. Ahmed ve gayr