Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 174 Hüküm no: 182 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kayıp olan Mehmed Çelebi b. Mehmed’in arsasının çocuklarının ihtiyaçlarını karşılamak için Şeyh Abdullah Efendi’ye satıldığı Medîne-i Hazret-i Ebâ Eyyûb Ensârî -dâme fî rıdvâni’l-Bârî-’de Baba Haydar mahallesi sâkinlerinden olup bundan akdem gaybet-i münkatı‘a ile gaybet ve hayâtı ve memâtı nâ-ma‘lûm olan Mehmed Çelebi b. Mehmed nâm kimesnenin sulbî sagīr oğlu İbrahim ile sulbiye sagīre kızı Âişe’nin tesviye-i umûrlarına kıbel-i şer‘-i kavîmden mansûb vasîleri ve ammileri olan Mustafa Beşe b. Mehmed nâm râcil meclis-i şer‘-i şerîfde işbu râfi‘ü’l-kitâbi’l-müstetâb fahrü’l-meşâyih eş-Şeyh Abdullah Efendi b. İsâ mahzarında bi’l-vesâye ikrâr-ı tâm ve takrîr-i kelâm edip mahalle-i mezbûrede bir tarafdan Yakub Çelebi mülkü ve etrâf-ı selâsesi vakıf menzil ile mahdûd tûlen ve arzan bi hesâb-ı satrancî otuz altı zirâ‘ sırf arsa-i hâliye gāib-i mezbûrun mülkü olup lâkin sagīrân-ı mezbûrânın zarûreti nafakalar için âhara bey‘ olunmak lâzım gelmekle sûk-ı sultânîde ba‘de’l-müzâyede ve inkıtâ‘i’r-rağbe mezbûr Abdullah Efendi üzerinde iki bin cedîd akçede karâr etmeğin arsa-i mezbûreyi merkūm Abdullah Efendi’ye vesâyetim hasebiyle meblağ-ı mezkûr iki bin akçeye bey‘-i kat‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm arsa-i merkūmede sagīrân-ı mezbû[r]ânın vechen mine’l-vücûhi’ş-şer‘iyye alâkaları kalmadı mezbûr eş-Şeyh Abdullah Efendi’nin mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Davud Efendi b. Ahmed el-Kadı, Mehmed Halîfe b. Ali el-Müezzin, Şaban b. Oruc, Ahmed Beşe b. Mustafa, Halil Beşe b. Mehmed, Veli Beşe b. Mehmed ve gayruhüm mine’l-huzzâr