Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 175 Hüküm no: 183 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultan Bayezid Evkâfı’ndan olan Azadlı köyünün sınırındaki tarlaların öşrünü Ayayorgi köyü mülteziminin aldığı, Azadlı köyü mülteziminin hakkı olduğu Cennet-mekân firdevs-âşiyân Sultan Bayezid Hân -aleyhi’r-rahmetü ve’l-gufrân- hazretlerinin evkāfı karyelerinden olup Havâss-ı sultâniyye -humiyet ale’l-beliyye- kazâsına tâbi‘ Terkos nâhiyesi muzâfâtından Ayayorgi nâm karyenin mültezimi olan Palago v. Petro nâm nasrânî meclis-i şer‘-i şerîfde işbu râfi‘ü’l-kitâb Muslu Bey b. Abdülvehhâb nâm kimesne muvâcehesinde üzerine da‘vâ ve takrîr-i kelâm edip taht-ı iltizâmımda olan mezbûr Ayayorgi karyesi ahâlîsinden ba‘zılar nâhiye-i merkūme tevâbi‘inden Âzadlı nâm karye sınırı dâhilinde birkaç tarla zirâ‘at etmekle hâsıl olan terekeden kendi re‘âyâmın olmağla otuz iki keyl buğday ile on yedi keyl alef öşür almışidim, hâlen zikr olunan Âzadlı karyesi merkūm Muslu Bey’in taht-ı iltizâmında olmağla ol öşrü ben alırın de[yû] ta‘arruz eder suâl olunsun dedikde gıbbe’s-suâl merkūm Muslu Bey cevâbında kadîmü’l-eyyâmdan her kimin taht-ı iltizâmında olan toprakda bulunursa öşrünü ol alagelmişdir, hâlen merkūm Palago’nun bi gayr-ı vech-i şer‘î kabz eylediği öşrü taleb ederin deyû hâlen şeyhülislâm ve müfti’l-enâm -sellemehü’s-selâm- hazretlerinden yedinde olan fetvâ-yı şerîfesin ibrâz ve merkūm Palago muvâcehesinde feth ve kırâ’at olundukda mazmûn-ı şerîfi bir vakfın karyelerinden birisini Zeyd der-uhde edip ve âhar karyenin Amr der-uhde eyledikden sonra Zeyd’in iltizâmında olan karyenin sınırında olan tarlaları âhar karyenin re‘âyâsı zirâ‘at edip hâsıl olan mahsûllerinden öşrünü Zeyd’e vermek istediklerinde Amr vermeyip elbette bana verin deyû cebre kādir olur mu deyû istiftâ olundukda cevâb-ı bâ-savâblarında olmaz deyû buyrulmağın ber mûceb-i fetvâ-yı şerîfe mezbûr Palago’nun bi gayr-ı vech-i şer‘î kabz eylediği otuz iki keyl buğday ile on yedi keyl alefi mersûm Muslu’ya teslîm etmeye mersûm Palago’ya tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâmin min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mahmud Beşe b. Ömer, Mehmed Efendi b. Nasuh, Mustafa Beşe b. Mehmed, Hüseyin Beşe b. Ali, Dilâver b. Abdullah