Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 176 Hüküm no: 184 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır Beşe b. Haydar’ın Dimo v. Kosta’ya sattığı koyun bedeli ile ödünç ve kefâletten alacağını talep ettiği Medîne-i Hazret-i Ebâ Eyyûb el-Ensârî -âmelehu’llâhu te‘âlâ bi lütfihi’l-cârî-de kasab tâ’ifesinden işbu râfi‘ü’l-kitâb Hızır Beşe b. Haydar nâm râcil meclis-i şer‘-i şerîf-i lâzımü’t-teşrîfde yine tâ’ife-i merkūmeden olup ...? kanadârî? olan Dimo v. Kosta nâm nasrânî muvâcehesinde üzerine da‘vâ ve takrîr-i kelâm edip mersûm Dimo zimmetinde vezn ve mikdârı beynimizde ilm-i şer‘î ile ma‘lûm yedinden müşter[â] ve makbûz lahm-ı ganem bahâsından bin dokuz yüz akçe ve cihet-i deyn-i şer‘îden yetmiş akçe ve cihet-i kefâletden doksan akçe ki cem‘an iki bin altmış akçe hakkım olup hâlen meblağ-ı mezbûru merkūm Dimo’dan taleb eylediğimde edâdan imtinâ‘ eder suâl olunup meblağ-ı mezbûru bana def‘ ve teslîm olunmasına tenbîh olunmak matlûbumdur dedikde gıbbe’s-suâl mezbûr Dimo cevâbında fi’l-hakīka müdde‘î-i merkūm Hızır Beşe’ye vech-i muharrer üzre lahm-ı ganem semeninden ve ciheteyn-i merkūmeteynden cem‘an iki bin altmış akçe hâlen zimmetimde vâcibü’l-edâ ve lâzımü’l-kazâ deynim vardır deyû tav‘an ikrâr ve i‘tirâf etmeğin ikrârı mûcebince meblağ-ı mezbûru merkūm Hızır Beşe’ye tamâmen edâ ve teslîme mesfûr Dimo’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Ali Beşe b. Mustafa, Mustafa Beşe b. Mehmed, Hüseyin Beşe b. Ali, Bayram Sofu b. Mehmed ve gayr