Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 176 Hüküm no: 185 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni Hâtun bt. Yusuf’un zevci Mustafa b. Abdülkerim’den muhâlaa ile boşandığı Medîne-i Hazret-i Ebî [Eyyûb] el-Ensârî -dâme fî [rı]dvâni’l-Bârî-’de Çavuş Kasım mahallesi sâkin[e]lerinden Ümmühâni Hâtun bt. Yusuf meclis-i şer‘-i şerîfde zevci işbu râfi‘ü’l-kitâb Mustafa b. Abdülkerim nâm kimesne muvâcehesinde ikrâr ve takrîr-i kelâm edip mezbûr Mustafa zevcim olup lâkin hüsn-i mu‘âşeretimiz olmamağla beynimizde şikāk-ı küllî vâkı‘a olmağın mezbûr Mustafa zimmetinde mütekarrir olan dört yüz cedîd akçe mehr-i müeccel ile nafaka-i iddet ve me’ûnet-i süknâm mukābelesinde üç yüz seksen cedîd akçe ki cem‘an yedi yüz seksen cedîd akçeyi yedinden tamâmen ahz ü kabz eylediğimden sonra mehr-i mu‘accelim olup mezbûr Mustafa’nın zimmetinde olan bir yemeni yorgan ve bir beledî döşek ve bir kırmızı kilim ve bir dârâyî kaftan ve bir tencere ve bir sahan da‘vâsından fâriğ olup eşyâ-i merkūme ve zevciyete müte‘allik olan da‘vâdan mezbûr Mustafa’nın zimmetini ibrâ ve iskāt etmek üzre muhâla‘a-i sahîha-i şer‘iyye ile muhâla‘a olup ahadühümâ âharı zevciyete müte‘allik da‘vâ ve mütâlebeden ibrâ ve iskāt eyledik dedikde mezbûr Mustafa dahi merkūme Ümmühâni Hâtun’u vech-i muharrer üzre hul‘ edip zevciyete müte‘allik da‘vâ ve mütâlebâtdan her bir[i] âharın zimmetini ibrâ eyledikde gıbbe’t-tasdîk kayd olundu. Fi’l-yevmi’t-tâsi‘ aşer min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Ali Beşe b. Mustafa, Hüseyin Beşe b. Ali, Bayram Sofu b. Mehmed, Abdi Beşe b. İskender, Mustafa b. Mehmed ve gayr