Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 177 Hüküm no: 186 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Mustafa Halîfe’nin ortaklarıyla birlikte satın aldığı öküzlerin bedelini kendisinin ödediği, ortaklarının hisselerine düşeni ona ödemesi gerektiği Medîne-i Ebâ Eyyûb el-Ensârî -dâme fî rıdvâni’l-Bârî- mahallâtından Çavuş Kasım mahallesi sükkânından işbu râfi‘ü’l-kitâb Mustafa Halîfe b. İlyas nâm kimesne meclis-i şer‘-i şerîf-i lâzımü’t-tevkīrde Ali Beşe b. Mehmed ve Derviş Beşe b. Mehmed nâm kimesneler muvâcehelerinde üzerlerine da‘vâ ve takrîr-i kelâm edip mezbûrân Ali Beşe ve Derviş Beşe ile mukaddemâ kasablık san‘atında şirket-i mufâvaza vechi üzre şerîkler olmağla işbu hâzır bi’l-meclis kasablar kethüdâsı olan İbrahim Ağa b. Şaban nâm kimesneden bundan akdem iştirâ eylediğimiz kara sığırı öküzleri bahâsından ba‘de küllî hesâb sekiz bin akçe deynimiz olmağın mezbûr İbrahim Ağa meblağ-ı mezbûru vech-i mübeyyen üzre her birimiz âharın zimmetine lâzım gelen mâla kefîl olmağla meblağ-ı mezbûru benden ahz ü kabz eylemişidi, ben dahi mezbûrânın her birinin zimmetine lâzım gelen ikişer bin altışar yüz altmış altışar akçeden cem‘an beş bin üç yüz otuz iki akçeyi mezbûrân Ali Beşe ve Derviş Beşe’den taleb ederin suâl olunsun dedikde gıbbe’s-suâl mezbûrân Ali Beşe ve Derviş Beşe cevâblarında fi’l-hakīka müdde‘î-i mezbûr ile şirket-i mufâvaza vechi üzre şerîkler olup meblağ-ı mezbûr sekiz bin akçeyi mezbûr İbrahim Ağa’ya müdde‘î-i mezbûr tamâmen def‘ ve teslîm etmekle hâlen bizim zimmetimize lâzım gelen cem‘an beş bin üç yüz otuz iki cedîd akçe mezbûr Mustafa Halîfe’ye zimmetimizde lâzımü’l-edâ deynimiz vardır [deyû] her biri tâyi‘an ikrâr ve i‘tirâf edip [37a] ikrârları mûcebince meblağ-ı mezbûr beş bin üç yüz otuz iki akçeyi merkūm Mustafa’ya Halîfe’ye edâ ve teslîme mezbûrân Ali Beşe’ye [ve Derviş Beşe’ye] tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Ali Beşe b. Selman el-Mübâşir, Hasan Beşe b. Mustafa, el-Hâc Yusuf b. Şaban, Mahmud Beşe b. Mustafa