Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 178 Hüküm no: 187 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seher Hâtun bt. Abdülmennân’ın mülk evinin yarı hissesini zevci Mehmed Subaşı b. Mahmud’a sattığı Husûs-ı âti’z-zikrin mahallinde tahrîri iltimâs olunmağın kıbel-i şer‘-i şerîfden fahrü’l-kuzât Mevlânâ Mehmed Efendi b. Nasuh irsâl olunup ol dahi zeyl-i kitâbda mastûrü’l-esâmî müslimîn ile medîne-i Hazret-i Ebâ Eyyûb el-Ensârî mahallâtından Bıçakçı Ferhad mahallesi sâkinelerinden umdetü’l-muhadderât Seher Hâtun bt. Abdülmennân’ın menziline varıp akd-i meclis-i şer‘-i şerîf eyledikde mezbûre Seher Hâtun cemî‘ tasarrufât-ı şer‘iyyesi nâfize olduğu hâlde meclis-i ma‘kūd-ı mezkûrda zevci işbu râfi‘ü’l-kitâb fahrü’l-eşbâh Mehmed Subaşı b. Mahmud nâm kimesne mahzarında bi tav‘ihâ ikrâr edip silk-i mülk-i sahîhinde münselik olup mahalle-i mezbûrede vâki‘ bir tarafdan Yusuf Bey nâm cündî mülkü ve bir tarafdan Canfeda Hâtun mülkü ve bir tarafdan Fâtıma Hâtun mülkü ve bir tarafdan tarîk-i âm ile mahdûd iki bâb fevkānî odaları ve tahtapûşu ve sofayı ve bir bâb tahtânî odayı ve ahırı ve su kuyusunu ve kenîfi müştemil mülk menzilimin tarîk-i âm tarafından nısf-ı şâyi‘ini zevcim mezbûr Mehmed Subaşı’ya on iki bin iki yüz elli cedîd fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘-i sahîh-i şer‘î ile bâtten bey‘ ve teslîm edip ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan mârrü’z-zikr on iki bin iki yüz elli akçenin iki yüz elli akçesini zevcim mezbûr Mehmed Subaşı yedinden ahz ü kabz edip semen-i bâkī on iki bin akçeyi zevcim mezbûr Subaşı’ya cihet-i deyn-i şer‘îden zimmetimde deynim olan on iki bin akçe hakkıyla takas eyleyip ol dahi mukāssa ve kabûl eyledikden sonra min ba‘d menzil-i mahdûd-ı mezkûrun tarîk-i âm tarafından olan nısf-ı şâyi‘inde vechen mine’l-vücûhi’ş-şer‘iyye alâka ve medhalim kalmadı zevcim mezbûr Mehmed Subaşı’nın mülk-i müşterâsıdır keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî husûs-ı mezbûru Mevlânâ-yı müşârun-ileyh mahallinde tahrîr ba‘dehû gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb ü tahrîr olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: İsmail Çelebi b. Rüstem, Şaban Efendi b. Kenan, Halil Halîfe b. Haydar el-İmâm, Ömer Ağa b. Mehmed, Halil Çelebi b. Hüdâverdi, Mustafa Ağa b. Kalender, Halil Çelebi b. İbrahim, Mehmed Bey b. Hasan, Mehmed Halîfe b. Yusuf el-Müezzin, İbrahim Beşe b. Mehmed, Mahmud Çelebi b. Ömer Ağa, Ahmed Çelebi b. Mehmed, Mustafa Ağa b. ( ) el-Cündî, Ali Beşe b. Mustafa, Osman Beşe b. Abdullah ve gayr