Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 179 Hüküm no: 188 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Beşe b. Abdülbâki’nin tasarrufundaki vakıf tarlanın tasarruf hakkını Derviş Ağa’ya devrettiği Mahrûse-i İstanbul’da Yenikapı dâhilinde vâki‘ Karabaş mahallesi sâkinlerinden İbrahim Beşe b. Abdülbâkī nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Derviş Ağa b. ( ) nâm kimesne tarafından tefvîz-i câ’i’z-zikri tasdîke vekîl olup Ömer Beşe b. Abdülmennân ve Derviş b. Pîrî nâm kimesneler şehâdetleri ile şer‘an vekâlet-i sâbite olan umdetü’l-eşbâh Mehmed Çelebi b. Kurd Ağa nâm kimesne muvâcehesinde bi tav‘ihâ ikrâr ve i‘tirâf edip merhûm Sultan Bayezid Hân -aleyhi’r-rahmetü ve’l-gufrân- hazretleri evkāfı arâzisinden olup Havâss-ı Kostantıniyye kazâsına tâbi‘ Çekmece-i kübrâ nâhiyesi ihtivâsından İskeçe nâm karyede vâki‘ bir tarafdan Velyazer v. Anastaş tarlası ve bir tarafdan Yanaki v. Papas tarlası ve bir tarafdan Ergiri v. ( ) nâm zimmî tarlası ve bir tarafdan vâdi ile mahdûd olup tahmînen yirmi keyl tohum istî‘âb eder bir kıt‘a tarlanın hakk-ı tasarrufunu evkāf-ı mezbûr mütevellîsi ma‘rifetiyle müvekkil-i mezbûr Derviş Ağa’ya bin cedîd akçe bedel mukābelesinde tefvîz ve ferağ edip ol dahi vech-i mübeyyen üzre tefevvuz ve kabûl eyledikden sonra hakk-ı ferağ olan meblağ-ı mezbûru müvekkil-i müşârun-ileyh yedinden tamâmen ahz ü kabz eyledim ba‘de’l-yevm benim alâkam yokdur müvekkil-i mezbûr emsâli tasarrufu gibi mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fî 23 min Zilka‘de sene 1065. Şuhûdü’l-hâl: Süleyman Çelebi el-Cündî, Hasan Beşe b. Abdullah, Veli Çavuş b. Abdullah, es-Seyyid Abdullah Çelebi b. Vildan, Ali Beşe b. Mustafa ve gayr