Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 179 Hüküm no: 189 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seher Hâtun bt. Abdülmennân’ın muhtelif eşyasını zevci Mehmed Subaşı b. Mahmud’a hibe ettiği Husûs-ı câ’i’z-zikrin mahallinde tahrîri iltimâs olunmağın cânib-i şer‘-i kavîmden Mevlânâ Mehmed Efendi b. Nasuh irsâl olunup ol dahi zeyl-i vesîkada muharrerü’l-esâmî müslimîn ile medîne-i Hazret-i Ebâ Eyyûb el-Ensârî mahallâtından Bıçakçı Ferhad mahallesi sâkinelerinden fahrü’l-muhadderât Seher Hâtun bt. Abdülmennân’ın menziline varıp akd-i meclis-i şer‘-i şerîf eyledikde mezbûre Seher Hâtun cemî‘ tasarrufât-ı şer‘iyye[si] nâfize olduğu hâlde meclis-i makūd-ı mezkûrda zevci işbu râfi‘ü’l-kitâbi’l-müstetâb fahrü’l-emsâl Mehmed Subaşı b. Mahmud nâm kimesne mahzarında bi tav‘ihâ ikrâr ve i‘tirâf edip silk-i mülk-i sahîhimde münselik olan emlâkimden üç minder ve bir beledî döşek ve bir köhne orta keçesi ve beş münakkaş yastık [ve] dört köhne yorgan ve bir beyaz tiftik kebesi ve biri kebîr biri sagīr iki tencere ve iki sagīr sahan kapağıyla ve bir kebîr güğüm ve bir leğen ma‘a ibrik ve bir bakır kebîr sini ve bir sagīr tâbe ve bir şamdan ve bir tûc tasımı zevcim mezbûr Mehmed Subaşı’ya hibe-i sahîha-i şer‘iyye ile hibe ve teslîm ve temlîk edip ol dahi minvâl-i meşrûh üzre ittihâb ve tesellüm ve temellük eyledikden sonra min ba‘d eşyâ-i merkū[me]de vechen mine’l-vücûhi’ş-şer‘iyye alâkam kalmadı, zevcim mezbûr Mehmed Subaşı’nın emlâk-i mevhûbesi olmuşdur keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî vâki‘ hâli Mevlânâ-yı mûmâ-ileyh mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe min şuhûri sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: İsmail Çelebi b. Rüstem, Halil Çelebi b. Haydar el-İmâm, Ömer Ağa b. Mehmed, Halil Çelebi b. Hüdâverdi, Ahmed Çelebi b. Abdullah, Mustafa Ağa b. Kalender, Mehmed b. Yusuf el-Müezzin, Halil Çelebi b. İbrahim, Mehmed Bey b. Hasan, Mahmud Çelebi b. Mehmed Ağa, İbrahim Beşe b. Mehmed, Ahmed Çelebi b. Mehmed, Mustafa Beşe b. Mehmed, Osman Beşe b. Abdullah, Ali Beşe b. Mustafa, Mustafa Ağa b. ( ) el-Cündî ve gayruhüm mine’l-hâzırîn