Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 180 Hüküm no: 190 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seher Hâtun bt. Abdülmennân’ın Rus asıllı Kamer adlı câriyesini azat ettiği ve muhtelif eşyasını hibe ettiği Husûs-ı âti’z-zikrin mahallinde tahrîr-i iltimâs olunmağın savb-ı şer‘-i şerîfden fahrü’l-kuzât Mevlânâ Mehmed Efendi b. Nasuh irsâl olunup ol dahi zeyl-i kitâbda mastûrü’l-esâmî müslimîn ile medîne-i Hazret-i Ebâ Eyyûb el-Ensârî mahallâtından Bıçakçı Ferhad mahallesi sâkinelerinden umdetü’l-muhadderât Seher Hâtun bt. Abdülmennân’ın menziline varıp akd-i meclis-i şerîf eyledikde merkūme Seher Hâtun cemî‘ tasarrufât-ı şer‘iyyesi nâfize olduğu hâlde meclis-i ma‘kūd-ı mezkûrda kendiye rıkkını mu‘terife uzun boylu gök elâ gözlü açık kaşlı Rusiyyetü’l-asl olan işbu sâhibetü’l-kitâb Kamer bt. Abdullah nâm câriye-i memlûkesi mahzarında bi tav‘ihâ ikrâr-ı sahîh-i şer‘î kılıp câriye-i mevsûfe-i mezbûreyi cemî‘ mâlımdan ifrâz ve i‘tâk-ı sahîh-i şer‘î ile i‘tâk ve tahrîr edip mezbûr sâir harâir-i asliyyât gibi hürre olsun ba‘de’l-yevm üzerinde hakk-ı velâdan gayrı hakkım bâkī kalmadı dedikde gıbbe’t-tasdîki’ş-şer‘iyyi’l-vicâhî yine mukırra-i mezbûre Seher Hâtun mu‘takası merkūme mahzarında i‘âde-i kelâm edip emlâkimden üç minder [ve] dört yastık ve bir bağdâdî döşek ve üç münakkaş köhne yorga[n] ve iki sahan ve bir güğüm ve bir hamam leğeni ve bir leğen ma‘a ibrik ve bir baklava tepsisi ve bir köhne örme keçesi ve bir kırmızı velençe ve bir tâbe ve bir tasımı mezbûre Kamer’e hibe-i sahîha-i şer‘iyye ile hibe ve teslîm ve temlîk edip ol dahi minvâl-i mübeyyen üzre ittihâb ve tesellüm ve temlîk eylediğimden sonra ba‘de’l-yevm [eşyâ-i] merkūmede vechen mine’l-vücûhi’ş-şer‘iyye alâkam kalmadı merkūme Kamer Hâtun’un emlâk-i mevhûbesi olmuşdur keyfemâ teşâ mutasarrıfe olsun dedikde ba‘de’t-tasdîki’l-mu‘teber husûs-ı mezbûru Mevlânâ-yı mezbûr mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûd[ü’l-hâl]: Es-Sâbikūn