Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 181 Hüküm no: 191 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seher Hâtun bt. Abdülmennân’ın Rus asıllı Kâtibe adlı câriyesini azat ettiği ve muhtelif eşyasını hibe ettiği Husûs-ı âti’z-zikrin mahallinde tahrîri iltimâs olunmağın taraf-ı şer‘-i şerîfden fahrü’l-kuzât Mevlânâ Mehmed Efendi b. Nasuh irsâl olunup ol dahi zeyl-i vesîkada mastûretü’l-esâmî müslimîn ile medîne-i Hazret-i Ebâ Eyyûb el-Ensârî mahallâtından Bıçakçı Ferhad mahallesi sâkinelerinden umdetü’l-muhadderât Seher Hâtun bt. Abdülmennân’ın menziline varıp akd-i meclis-i şer‘-i şerîf eyledikde merkūme Seher Hâtun cemî‘ tasarrufât-ı şer‘iyyesi nâfize olduğu hâlde meclis-i ma‘kūd-ı mezbûrda kendiye rıkkını mu‘terife olup orta boylu açık kaşlı elâ gözlü Rusiyyetü’l-asl olan işbu sâhibetü’l-kitâb Kâtibe bt. Abdullah nâm câriye-i memlûkesi mahzarında tav‘an ikrâr edip câriye-i memlûke-i mevsûfe Kâtibe’yi hasbeten lillâhi’l-azîm ve taleben li merdâti rabbi’r-rahîm cemî‘ mâlımdan ifrâz ve i‘tâk-ı sahîh-i şer‘î ile i‘tâk ve tahrîr edip min ba‘d sâir harâir-i asliyyât gibi hürre olsun ba‘de’l-yevm üzerinde hakk-ı velâdan gayrı hakkım kalmadı dedikde gıbbe’t-tasdîki’ş-şer‘iyyi’l-vicâhî yine mukırra-i mezbûre Seher Hâtun mu‘takası merkūme Kâtibe mahzarında i‘âde-i kelâm edip emlâkimden üç minder ve üç köhne yastık ve bir sahan ve bir tencere ve bir güğüm ve iki yorgan ve bir sagīr kaliçe ve bir tepsi ve bir tasımı merkūme Kâtibe’ye hibe-i sahîha-i şer‘iyye ile hibe ve teslîm ol dahi meclis-i hibede vech-i muharrer üzre ittihâb ve tesellüm ve kabz ve kabûl eyledikden sonra min ba‘d eşyâ-i mezbûrda vechen mine’l-vücûhi’ş-şer‘iyye alâkam kalmadı merkūme Kâtibe’nin emlâk-i mevhûbesi olmuşdur keyfemâ teşâ ve hasbemâ tehtâr mutasarrıfe olsun dedikde ba‘de’t-tasdîki’l-mu‘teber husûs-ı mezbûru Mevlânâ-yı mezbûr mahallinde tahrîr ba‘dehû gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Es-Sâbikūn