Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 182 Hüküm no: 192 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mehmed’in Receb Beşe hakkında kendisini ve annesini darb ettiği iddiasıyla açtığı davada sulh oldukları Medîne-i Hazret-i Ebâ Eyyûb el-Ensârî mahallâtından Yeni mahalle sâkinlerinden Mehmed b. Mehmed nâm şâbb-ı emred meclis-i şer‘-i şerîfde işbu râfi‘ü’l-kitâb Receb Beşe b. Abdullah nâm kimesne tarafından sulh-ı câ’i’z-zikri tasdîke vekîl olup bimâ hüve tarîkü’s-sübût şer‘an vekâleti sâbite olan Hüseyin Beşe b. Mehmed nâm vekîl muvâcehesinde kendi tarafından asâleten ve vâlidesi Belkıs Hâtun bt. Abdülbâkī’nin vekîl-i şer‘îsi olmağla vekâleten ikrâr-ı tâm ve takrîr-i kelâm edip bundan akdem müvekkil-i mezbûr Receb Beşe bi gayr-ı vech-i şer‘î taş ile sol elime darb edip beni mecrûh eyledikden sonra vâlidem müvekkile-i merkūmenin dahi başına ve arkasına değnek ile bi gayr-ı vech-i şer‘î darb edip şütûm-i galîza ile şetm dahi eyledikde ben dahi asâleten ve vekâlet-i mahkiyem hasebiyle mûcebini müvekkil-i merkūm Receb Beşe’den da‘vâ ve taleb eylediğimde müvekkil-i mesfûr münkir oldukda muvâcehesinde şuhûd-ı udûlle isbât etmekle beynimizde münâza‘ât-ı kesîre cereyân etmişidi, el-hâletü hâzihî beynimize müslimûn ve muslihûn tavassut edip husûs-ı merkūm da‘vâsından beni dört yüz cedîd akçe üzre inşâ’-i akd-i sulh eylediklerinde ben dahi asâlet ve vekâlet-i mahkiyem hasebiyle sulh-ı mezbûru kabûl ve bedel-i sulh olan meblağ-ı mezbûr dört yüz akçeyi yedinden tamâmen ahz ü kabz edip husûs-ı mezbûra ve gayrı husûsa müte‘allik cemî‘ da‘vâdan müvekkil-i mezbûr Receb Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim min ba‘d da‘vâ ve nizâ‘ım yokdur sudûr dahi ederse lede’l-hükkâmi’l-kirâm istimâ‘ olunmaya dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb ve imlâ olundu. Fi’l-yevmi’s-sâlis ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mehmed Bey b. Hasan, Mustafa Beşe b. Pîrî, Hasan Beşe b. Mehmed, Mehmed Beşe b. Ali, Mehmed Beşe b. Abdülbâkī ve gayr