Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 182 Hüküm no: 193 Orijinal metin no: [38a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seher Hâtun bt. Abdülmennân’ın zevci Mehmed Subaşı b. Mahmud’da olan mehir alacağının üç bin akçesini tahsil ettiği, bin akçe alacağı kaldığı Husûs-ı âti’z-zikrin mahallinde tahrîr-i iltimâs olunmağın kıbel-i şer‘-i şerîfden fahrü’l-kuzât Mevlânâ Mehmed Efendi b. Nasuh irsâl olunup ol dahi zeyl-i kitâbda muharrerü’l-esâmî müslimîn ile medîne-i Ebâ Eyyûb el-Ensârî mahallâtından Bıçakçı Ferhad mahallesi sâkinelerinden umdetü’l-muhadderât Seher Hâtun bt. Abdülmennân’ın menziline varıp akd-i meclis-i şer‘-i şerîf eyledikde mezbûre Seher Hâtun cemî‘ tasarrufât-ı şer‘iyyesi nâfize olduğu hâlde meclis-i makūd-ı mezkûrda zevci işbu râfi‘ü’l-kitâbi’l-müstetâb fahrü’l-emsâl Mehmed Subaşı b. Mahmud nâm kimesne mahzarında bi tav‘ihâ ikrâr ve i‘tirâf edip zevcim mezbûr Mehmed Subaşı zimmetinde mütekarrir olan dört bin akçe mehr-i müeccelimin üç bin akçesini bundan esbak zevcim Mehmed Subaşı yedinden bi’t-tamâm ve’l-kemâl ahz ü kabz eyledim [38b] ba‘de’l-yevm zevcim mezbûr Mehmed Subaşı zimmetinde mehr-i müeccelimden bâkī bin akçeden ziyâde bir akçe ve bir habbe hakkım kalmamışdır dedikde gıbbe’t-tasdîki’ş-şer‘iyyi’l-vicâhî vâki‘ hâli Mevlânâ-yı müşârun-ileyh mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâlis ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: İsmail Çelebi b. Rüstem, Halil Halîfe b. Haydar el-İmâm, Şaban Efendi b. Kenan, Halil Çelebi b. Hüdâverdi, Ahmed Çelebi b. Abdullah, Mustafa Ağa b. Kalender, Ömer Ağa b. Mehmed, Mehmed Çelebi b. Mehmed, Halil Çelebi b. İbrahim, Mehmed Bey b. Hasan, Mehmed b. Yusuf el-Müezzin, İbrahim Beşe b. Mehmed, Mustafa Beşe b. Abdullah