Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 183 Hüküm no: 194 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Hüseyin’in mülk menzilinin zevcesi Meryem Hâtun bt. İbrahim’e satılması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Baba Haydar mahallesi sâkinlerinden Ali Çelebi b. Hüseyin nâm şâb meclis-i şer‘-i hatîr-i lâzımü’t-tevkīrde zevcesi işbu sâhibetü’l-kitâb Meryem Hâtun bt. İbrahim mahzarında bi’t-tav‘i’s-sâf ikrâr ve i‘tirâf edip silk-i mülkümde münselik olup mahalle-i mezbûrede [vâki‘] bir tarafdan Hamza Ağa odaları ve bir tarafdan yine benim âhar mülküm ve iki tarafdan tarîk-i âm ile mahdûd bir bâb fevkānî ve bir bâb tahtânî odaları ve müşterek su kuyusu ve havluyu müştemil mülk menzilimi cemî‘ tevâbi‘iyle zevcem mezbûre Meryem Hâtun’a sekiz bin cedîd akçeye tarafe[y]nden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semen-i mârrü’z-zikr sekiz bin akçeyi mezbûre Meryem Hâtun yedinden tamâmen ahz ü kabz eyledim, min ba‘d menzil-i mahdûd-ı mezkûrda vechen mine’l-vücûhi’ş-şer‘iyye alâkam kalmadı zevcem merkūmenin mülk-i müşterâsıdır keyfemâ teşâ ve hasbemâ tehtâr mutasarrıfe olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Mehmed Efendi b. Habil el-Kadı, fahrü’l-kuzât Sinan Efendi b. el-Hâc Derviş, Mehmed Beşe b. Abdullah, Bayram Çavuş b. Mustafa, Mehmed Çavuş b. Mustafa, Ali Beşe b. Mustafa, Abdullah Beşe b. İskender, Dilâver Beşe b. Abdullah, Hüseyin Çelebi b. Ali, muharrirü’l-vesîka Mehmed el-mevlâ ve gayruhüm mine’l-hâzırîn