Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 184 Hüküm no: 195 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seher Hâtun bt. Abdülmennân’ın mülk evinin yarı hissesini azat ettiği câriyeleri Kamer ile Kâtibe’ye sattığı ve bedelinden zimmetlerini ibrâ ettiği Husûs-ı câ’i’z-zikrin mahallinde tahrîr-i iltimâs olunmağın cânib-i şer‘-i şerîfden umdetü’l-kuzât Mevlânâ Mehmed Efendi b. Nasuh irsâl olunup ol dahi zeyl-i vesîkada mastûretü’l-esâmî müslimîn ile medîne-i Hazret-i Ebâ Eyyûb el-Ensârî mahallâtından Bıçakçı Ferhad mahallesi sâkinelerinden fahrü’l-muhadderât Seher Hâtun bt. Abdülmennân’ın menziline varıp akd-i meclis-i şer‘-i şerîf eyledikde mezbûre Seher Hâtun cemî‘ tasarrufât-ı şer‘iyyesi nâfize olduğu hâlde meclis-i makūd-ı mezkûrda mu‘takaları işbu sâhibeti’l-kitâb Kamer bt. Abdullah ve Kâtibe bt. Abdullah nâm hâtunlar muvâcehelerinde bi tav‘ihâ ikrâr-ı sahîh-i şer‘î ve i‘tirâf-ı sarîh-i mer‘î kılıp silk-i mülk-i sahîhimde münselik ve muntazam olup mahalle-i mezbûrede vâki‘ bir tarafdan Yusuf Bey nâm cündî mülkü ve bir tarafdan Canfeda Hâtun mülkü ve bir tarafdan Fâtıma Hâtun mülkü ve bir tarafdan tarîk-i âm ile mahdûd iki bâb fevkānî odaları ve tahtapûşu ve sofayı ve bir bâb tahtânî odayı ve ahırı ve bir su kuyusu ve kenîfi müştemil mülk menzilin cânib-i garbîsinden nısf hisse-i şâyi‘ayı mu‘takalarım merkūmetân Kamer ve Kâtibe’ye dört bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip anlar dahi ber vech-i iştirâk mutasarrıf olmak üzre minvâl-i meşrûh üzre iştirâ ve tesellüm ve kabz ve kabûl eylediklerinden sonra semen-i mârrü’z-zikr dört bin akçeden mezbûretân Kamer ve Kâtibe’nin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm zikr olunan menzilin cânib-i garbîsinde olan nısf hisse-i şâyi‘am merkūmetânın mülk-i müşterâlarıdır keyfemâ teşâ’ân ve hasbemâ tehtârân mutasarrıfe olsunlar dedikde gıbbe’t-tasdîki’ş-şer‘iyyi’l-vicâhî husûs-ı mezbûru Mevlânâ-yı müşârun-ileyh mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâmis ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Fahrü’l-kuzât Mustafa Efendi b. Receb, Receb Efendi b. Abdi nâib-i racül? sâbıkan, Şaban Efendi b. Kenan, İsmail Efendi b. Rüstem, Halil Halîfe b. Haydar el-İmâm, Halil Çelebi b. Hüdâverdi, Ömer Ağa b. Mehmed Ağa, Mehmed Bey b. Hasan, Ahmed Çelebi b. Abdullah, Mehmed Halîfe b. Yusuf el-Müezzin, Halil Çelebi b. İbrahim, [39a] İbrahim Beşe b. Mehmed, Ali Beşe b. Mustafa, Ahmed Çelebi el-Ye[s]ârî?, Mustafa Beşe b. Mehmed, Osman Beşe b. Abdullah, Mustafa Bey b. Kalender ve gayruhüm mine’l-hâzırîn