Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 185 Hüküm no: 196 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi’nin zevcesi Âişe Hâtun’a ait çiftlik ile değirmeni ve muhtelif hayvanı ile zirâat aletlerini Ali Ağa’ya sattığı; vakıf tarlaların tasarruf hakkını devrettiği Mahmiye-i Kostantıniyye -hamâha’llâhu te‘âlâ ani’l-âfât ve’l-beliyye-de merhûm Molla Fenârî mahallesi sâkinlerinden Mustafa Çelebi b. el-merhûm Ömer Efendi husûs-ı câ’i’z-zikri bey‘a ve tefvîze ve kabz-ı semen ve bedele kendi tarafından asâleten ve zevcesi umdetü’l-muhadderât Âişe Hâtun bt. Mustafa’nın vekîli olup mezbûreyi ma‘rifet-i şer‘iyye ile ârifân olan Ma‘rûf b. İsmail ve İsmail b. Abdülbâkī nâm kimesneler şehâdetleriyle şer‘an vekâleti sâbite oldukdan sonra vekâleten meclis-i şerî’at-i şerîfede işbu sâhibü’l-kitâbi’l-müstetâb sâbıkan Dergâh-ı âlî -dâme mahfûfen bi’l-me‘âlî- yeniçerileri kethüdâsı iftihârü’l-emâcid ve’l-ekârim müstecmi‘u cemî‘i’l-mehâmid ve’l-mekârim Ali Ağa b. el-merhûm ( ) oğlu ve taraf-ı pür-şereflerinden husûs-ı âti’l-beyânı tasdîke vekîl olup Hasan Ağa b. Süleyman ve Hasan Çelebi b. Ali şehâdetleriyle şer‘an vekâleti sâbite olan umdetü’l-emâcid ve’l-e‘âlî Mehmed Ağa nâm kimesne mahzarında bi’l-asâle ve bi’l-vekâle ikrâr-ı tâm ve takrîr-i kelâm edip müvekkilem mezbûre Âişe Hâtun’un silk-i mülkünde münselik olup Havâss-ı refî‘a -humiyet ani’l-beliyye- kazâsına tâbi‘ Büyük Çekmece nâhiyesi ihtivâsından Pereşci demekle ma‘rûfe karyede vâki‘ iki tarafdan karındaşım Mehmed Efendi b. el-merhûm el-mezbûr Ömer Efendi mülkü ve iki tarafdan tarîk-i âm ile mahdûd muhavvata-i dâhiliyesi fevkānî ve tahtânî altı bâb odaları ve üç fevkānî sofayı ve bir matbah ve dört aded anbarı ve bir su kuyusunu ve hadîkayı müştemil ve muhavvata-i hâriciyesi bir bâb fevkānî ve bir bâb tahtânî odaları ve iki sofayı ve bir samanlık ve üç kıt‘a ahırı ve bir su kuyusu ve zât-ı eşcâr-ı müsmire ve gayr-ı müsmire bahçeyi ve kenîfi müştemil olup çiftlik ta‘bîr olunur menzil ile yine karye-i merkūmede vâki‘ hudûdu beynimizde ma‘lûme olup Papaz Pınarı demekle ma‘rûf nehir ile dâir bir göz değirmen dahi vekâletim hasebiyle müvekkil-i müşârun-ileyh Ali Ağa’ya bin üç yüz kıt‘a riyâlî guruşa bey‘ ve teslîm ol dahi minvâl-i mübeyyen üzre iştirâ ve tesellüm eyledikden sonra kendi mülküm olup seray-ı mezbûr içinde mevcûd iki çift camus ve dört kara sığırı öküzleri ile bir aded kara sığırı ineği ve bir buzağımı ve âlât-ı zirâ‘atımı ve bir müd buğday ve otuz keyl alef ve otuz keyl arpamı müvekkil-i müşârun-ileyh Ali Ağa’ya bi safkatin vâhidetin iki yüz kıt‘a riyâlî guruşa bey‘-i kat‘î ile bey‘ ve teslîm müvekkil-i müşârun-ileyh dahi iştirâ ve tesellüm ve kabz ve kabûl eyledikden sonra cennet-mekân firdevs-âşiyân merhûm Sultan Bayezid Hân -aleyhi’r-rahmetü ve’l-gufrân- hazretlerinin evkāfı arâzisinden olup karye-i merkūmede mevâzi‘-i müte‘addidede vâki‘ her birinin hudûdu beynimizde ma‘lûm tahmînen beş yüz otuz keyl tohum istî‘âb edip hâlen taht-ı tasarrufumda olan yirmi bir kıt‘a tarlalarımın hakk-ı tasarruflarını dahi evkāfı mezbûr mütevellî[si] ma‘rifetiyle müvekkil-i müşârun-ileyh Ali Ağa’ya iki yüz kıt‘a riyâlî guruş-ı kebîr bedel mukābelesinde tefvîz bi’l-ferağ eylediğimde müvekkil-i mûmâ-ileyh dahi vech-i meşrûh üzre tefevvuz ve kabûl eyledikden sonra semen-i mezbûr ile bedel-i merkūm cem‘an bin yedi yüz kıt‘a riyâlî guruş-ı kebîri müvekkil-i müşârun-ileyh Ali Ağa yedinden tamâmen asâlet ve vekâlet-i mahkiyem hasebiyle ahz ü kabz eyledim, ba‘de’l-yevm o çiftlik ve değirmende müvekkilemin ve mevâşî ve arâzide benim vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye alâka ve medhalim yokdur ba‘de’l-yevm emlâk mezbûrenin müşterâsı olmuşdur keyfemâ yeşâ ve yehtâr mutasarrıf ola ve [a]râzi-i merkūme dahi müvekkil-i müşârun-ileyh Ali Ağa’nın dâhil-i taht-ı tasarrufu olmuşdur emsâli tasarrufu gibi tasarruf eylesin dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Aynü’l-a‘yân el-Hâc Ahmed Ağa b. Ali Mahaşkirzâde, Mahmud Efendi b. Hasan el-İmâm, Mustafa Çelebi b. Süleyman, Eyüb Çelebi b. Ali, Bayram Ağa b. Hüseyin, Hüseyin Bey b. ( ) el-Cündî, Abdurrahman b. Ahmed, Ahmed Efendi b. Veli, Mehmed Efendi b. Ömer Efendi, el-Hâc Ali b. Abdullah, el-Hâc Hüseyin b. Ali, Mehmed Çavuş b. ( ) veznedâr, Sinan Çelebi el-Yesârî