Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 188 Hüküm no: 199 Orijinal metin no: [40a(1)-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden İsmail Çelebi’nin sağlığında Gürcü asıllı Kaytas b. Abdullah’ı azat ettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i kebîr mahallesi sâkinlerinden olup bundan akdem fevt olan İsmail Çelebi b. ( ) nâm müteveffânın verâseti zevce-i metrûkesi İsmîhân bt. Osman nâm hâtun ile sulbî sagīr oğulları Mehmed ve Mustafa’ya ve sulbiye kebîre kızı Saliha nâm hâtuna münhasıra olduğu şer‘an zâhir ve müte‘ayyin oldukdan sonra sagīrân-ı merkūmânın tesviye-i umûruna kıbel-i şer‘den mansûbe vasî olan merkūme İsmîhân Hâtun ve mersûme Saliha Hâtun taraflarından husûs-ı câ’i’z-zikri ikrâra vekîlleri olup mezbûretânı ma‘rifet-i şer‘iyye ile ârifân olan Ömer Çelebi b. Mehmed ve Mustafa Çelebi b. Abdülbâkī şehâdetleriyle şer‘an vekâleti sâbite olan Mustafa Çelebi b. Ali nâm kimesne meclis-i şer‘-i şerîf-i enver ve mahfil-i dîn-i münîf-i ezherde bi’l-vekâle ikrâr-ı tâm ve takrîr-i kelâm ve ifâde-i merâm edip müteveffâ-yı mezbûr abd-i memlûkü işbu bâ‘isü’l-kitâb orta boylu açık kaşlı gök elâ gözlü milleti Gürciyyü’l-asl Kaytas b. Abdullah nâm gulâmı hâl-i hayâtında ve kemâl-i akl-ı sıhhatinde cümle mâlından ifrâz ve i‘tâk ve tahrîr ve zümre-i ahrâr-ı asliyyeye ilhâk ve idrâc edip gulâm-ı mevsûf-ı mezbûr sâir ahrâr-ı asliyyîn gibi hür olup üzerinde hakk-ı velâdan gayrı hakkım bâkī kalmadı deyû gulâm-ı mezbûru âzâd etmekle biz dahi verâset ve vesâyet-i mahkiyemiz hasebiyle gulâm-ı mezbûrun i‘tâkını tenfîz eyledik dediler dedikde mâ hüve’l-vâki‘ gıbbe’l-ibtigā ketb olundu. Fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene hamsin ve sittîn ve elf. Şuhûdü’l-hâl: Ali Beşe b. Mustafa, Hüseyin Beşe b. Ali, Dilâver Beşe [b.] Abdullah, Bayram Sofu b. Mehmed, Mustafa Beşe b. Mehmed ve gayruhüm mine’l-hâzırîn