Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 193 Hüküm no: 203 Orijinal metin no: [40a(2)-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimo v. Lanbo’nun ölen Yani’nin kardeşi ve tek vârisi olduğu, Yani’nin Bako v. Yorgi zimmetinde kalan alacağını talep ettiği Fi’l-asl vilâyet-i Rumeli’nde Yenişehir kazâsına tâbi‘ Kuhistân nâhiyesi ihtivâsından Kalçoz nâm karye sâkinlerinden olup hâlen Havâss-ı aliyye kazâsı tevâbi‘inden Kalataz nâm karyede çoban tâ’ifesinden olan râfi‘ü hâze’s-sifr Dimo v. Lanbo nâm zimmî meclis-i şer‘-i şerîf-i lâzımü’t-teşrîfde Bako v. Yorgi nâm nasrânî muvâcehesinde üzerine da‘vâ ve takrîr-i kelâm edip kezâlik karye-i merkūmede tâ’ife-i mezbûreden olduğu hâlde mürd olan Yani nâm zimmînin mezbûr Bako zimmetinde cihet-i karz-ı şer‘îden iki bin akçe hakkı olup ben mürd-i mezbûrun li ebeveyn karındaşı ve hasran vârisi olmağla meblağ-ı merkūm bi hasebi’l-irsi’ş-şer‘î bana intikāl etmişiken hâlen taleb eylediğimde edâdan imtinâ‘ eder suâl olunsun dedikde gıbbe’s-suâl mezbûr Yako cevâbında fi’l-hakīka müdde‘î-i mezbûr karındaşımdır dediği hâlik-i merkūm Yani’ye cihet-i mersûmeden vech-i muharrer üzre iki bin akçe [deynim] vardır deyû ikrâr lâkin müdde‘î-i mezbûr Dimo hâlik-i merkūm Yani’nin minvâl-i mübeyyen üzre karındaşı olduğu[nu] münkir olıcak müdde‘î-i mezbûrdan müdde‘âsını mübeyyine beyyine taleb olundukda yine zikr olunan Kalçoz karyesi sükkânından Andriye v. Dimo ve Trandafilo v. Dimo v. İstati nâm zimmîler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘î-i mezbûr ile hâlik-i merkūm Yani li ebeveyn karındaşlar olup zîrâ babaları ismi Lanbo ve anaları ismi İşmilü nâm nasrâniye ve cedleri ismi Uyuri Lilu nâm zimmî ve maskat-ı re’sleri mezbûr Kalçoz kar[ye]sidir hâlik-i mezbûrun müdde‘î-i merkūm Dimo’dan gayrı vâris-i ma‘rûfu olduğu ma‘lûmumuz değildir, biz bu husûsa vech-i meşrûh üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâ’iti kabûlihâ şehâdetleri makbûle ve mesmû‘a olmağın mûcebiyle müdde‘î-i mezbûr Dimo’nun verâsetine hükm olunmağın meblağ-ı mezbûr iki bin akçeyi tamâmen edâ ve teslîme merkūm Yako’ya tenbîh olunup mâ hüve’l-vâki‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min Zilka‘deti’ş-şerîfe min şuhûri sene hamsin ve sittîn ve elf. Şuhûdü’l-hâl: Mustafa Beşe b. Mehmed, Ahmed Beşe b. Hasan, Ali Beşe b. Mustafa, Hüseyin Beşe b. Ali, İlya v. Dimitri, Yorgi v. Dimo, Yorgi v. Andros ve Kirbazi v. Paskarat ve gayruhüm