Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 194 Hüküm no: 204 Orijinal metin no: [40b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Bayram’ın mülk menzilinin Mustafa b. Mehmed’e satılması Havâss-ı aliyye kazâsına tâbi‘ Alibeyköyü demekle ma‘rûfe karye sükkânından Mehmed Beşe b. Bayram nâm kimesne meclis-i şerî’at-i şerîfede işbu râfi‘ü’l-kitâb Mustafa b. Mehmed nâ[m] kimesne mahzarında bi’t-tav‘i’s-sâf ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafdan Ahmed Çelebi b. Dede mülkü ve bir tarafdan yine benim âhar mülküm ve bir tarafdan Hüseyin Beşe b. Hasan mülkü ve bir tarafdan tarîk-i âm ile mahdûd iki bâb fevkānî ve bir bâb tahtânî odaları ve bir ahırı ve samanlığı ve müşterek su kuyusunu müştemil mülk menzilimi cemî‘ tevâbi‘ ve levâhıkıyla mezbûr Mustafa’ya on üç bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semen-i mârrü’z-zikr on üç bin akçeyi mezbûr Mustafa yedinden tamâmen ahz ü kabz eyledim ba‘de’l-yevm benim menzil-i mahdûd-ı mezkûrda vechen mine’l-vücûhi’ş-şer‘iyye alâkam kalmadı mezbûr Mustafa’nın mülk-i müşterâsıdır keyfemâ yeşâ [ve yehtâr] mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti Zilhicceti’ş-şerîfe li sene hamsin ve sittîn ve elf. Şuhûdü’l-hâl: Ramazan Halîfe b. Hüseyin el-İmâm, Mustafa b. Derviş, Hüseyin Beşe b. Hasan, İbrahim Beşe b. Mehmed, İsmail Beşe b. Mehmed ve gayr